Azər Bağırov: “Danışanda əzilmiş kimi sayılırıq”
“Heç olmasa 2 qol vurmalı idik. Oyuna yaxşı başladıq. İlk dəqiqələrdən hakim qərarsızlığı oyunumuza yaxşı təsir göstərmədi. Əks-hücumda qol buraxdıq. Üzücü oyun oldu. “Zirə”ni təbrik edirəm.
Msport.az xəbər verir ki, bu sözləri “Kəpəz”in baş məşqçisi Azər Bağırov Azərbaycan Premyer Liqasının XV turunun “Zirə” ilə oyunundan (0:4) sonra mətbuat konfransında deyib.
O, jurnalistlərin suallarını da cavablandırıb.
– Oyunun əvvəlində Ehtiram Şahverdiyevə qarşı kobulduq olan epizodun təkrarını izləmisiniz?
– Əlbəttə, baxmışıq. Rəqib Ehtiramı yüz faiz dartır, vurur. Hakimlər zəif komandalarda qarşı hansısa qərarı verəndə düz olurlar. Bu barədə danışmaq istəmirəm. Danışanda əzilmiş kimi sayılırıq.
– Luis Paçunun zədələnməsi oyununuza təsir etdi?
– Deməzdim. Orxan Əliyevin 100 faizli 3 epizodu oldu. O epizodlardan maksimum yararlanmalı idi. Həmişə demişəm, oyuna köklənmək çox önəmlidir. Həmin epizodlarda konsentrasiya istənilən kimi deyildi.
– Komanda 9-cu pillədədir. Qışda nələri dəyişmək istəyirsiniz?
– Yuxarı pillə ilə də çox böyük məsafəmiz yoxdur. Gücləndirəcəyimiz mövqelər olacaq. Hələ bu barədə danışmaq tezdir. Qarşıda 2 oyun var. Bu matçları xal baxımından yaxşı dəyərləndirmək lazımdır.
– Premyer Liqada qalmaq sizin üçün uğur sayılacaq?
– Klubun strategiyası Premyer Liqada qalmaqdır. Yuxarı qalxsaq, bizim uğurumuz olacaq. Çox işləmək, səhvləri minimuma endirmək lazımdır.
