Vasili Berezutski: "Limitin heç bir faydası yoxdur"
“Nəyisə şərh etmək çətindir. Amma ümid edirəm ki, nə vaxtsa “Sumqayıt”ın qapısına yol tapıb qol vuracağıq”.
Msport.az xəbər verir ki, bu sözləri “Sabah”ın baş məşqçisi Vasili Berezutski Azərbaycan Kubokunda “Sumqayıt”la qolsuz heç-heçə etdikləri 1/4 final mərhələsinin ilk oyunundan sonra keçirilmiş mətbuat konfransında deyib.
– “Sabah” heyətindəki futbolçuların maaşına görə ilk üçlükdə ola biləcək komandadır. Buna baxmayaraq, 5-ci pillədəsiniz. Bu gün də “Sumqayıt”ı məğlub edə bilmədiniz. Özünüz də demisiniz ki, prioritet ölkə kubokudur. Bu cür imkanlara sahib komandanın sona 15 tur qalmasına baxmayaraq, gözünü kuboka dikməsi nə qədər düzgündür?
– Sadəcə kubok oyununa deyil, çempionat matçına da köklənirik. Çünki qarşıda oyunlarımız var. Bizim məqsədimiz hər bir oyunda qalib gəlməkdir.
– AFFA İcraiyyə Komitəsi növbəti mövsümdən Premyer Liqada legioner limitini ləğv etdi. Bu məsələyə münasibətiniz necədir?
– Limit dünyanın heç bir ölkəsinə xeyir gətirməyib. Amma yenə də öz qərarlarıdır. Mən limitə qarşıyam. Fikrimcə, limitin heç bir faydası yoxdur.
– “Sumqayıt”la matçda Xəyal Əliyevə şans verdiniz. Bundan sonra da onu meydanda görə bilərik?
– O, demək olar ki, hər zaman meydana çıxır. Bundan əvvəlki matçda da oynayıb. Əksinə, Xəyal Əliyevin hansısa matçda oynamamasını xatırlamıram. Xəyalı bəyənirəm. Perspektivli futbolçudur. Böyük gələcəyi var. Azərbaycan futbolunda bu cür gənclərə şans vermək lazımdır. Çünki onlar inkişaf edəcəklər.
