Xorxe Kaskilya: “Çempionatın səviyyəsi yüksəkdir”
“İmişli” Azərbaycan Premyer Liqasının I turunda Şamaxı şəhər stadionunda “Turan Tovuz”a 0:1 hesabı ilə məğlub olub.
Msport.az xəbər verir ki, ev sahhiblərinin baş məşqçisi Xorxe Kaskilya matçdan sonra keçirilən mətbuat konfransında fikirlərini bildirib:
“Yaxşı oynadıq, müdafiə baxımından yaxşı idik. Son dəqiqədə qol buraxmaq ağırdır. Amma bu, futboldur. Birinci hissədə top daha çox mərkəzdə olurdu, komandalar bir-birini tanımağa çalışırdı. Amma ikinci hissdə taktiki cəhətdən daha yaxşı oynadıq. Şanslarımız da oldu. Son dəqiqələrdə müdafiəçimiz və qapıçımızın zədələnməsi oyuna təsir etdi. Diqqətimizi növbəti oyuna cəmləyəcəyik”.
– Əsas qapıçınız zədələndi. Onun yerinə legioner qolkiper transfer etməyi düşünürsüz?
– Hər iki oyunçumuz başından zədə aldı. Hələ ki Sinenkodan xəbər gözləyəcəyik. Bundan sonra qərar verəcəyik. Ümid edirəm ki, ikisi də tezliklə komandaya qoşulacaqlar.
– “Turan Tovuz” ötən mövsüm son dəqiqələrdə çox qol vururdu. Bunu təhlil etmişdiz?
– “Turan Tovuz”un oyunlarını təhlil edirdik. Bilirdik ki, aqressiv oynayırlar, uzun ötürmələrdən istifadə edirlər. Son dəqiqələr idi, oyunçularımız yorğun idilər. Uzun ötürmə ilə hücuma çıxdılar və qol vurdular.
– Azərbaycan Premyer Liqasında debüt etdiniz. Təəssüratlarınız necədir?
– Bura gəlməmişdən əvvəl araşdırmışam. Çempionatın səviyyəsi yüksəkdir. 4-5 səviyyəli komanda var. Burada yaxşı legionerlər çıxış edir. Bu oyun da mənə xoş təəssüratlar verdi.
– Bu çempionatda baş çıxaracağınıza inanırsız?
– Bura gəlməyimin səbəbi nəticə göstərməkdir. İlk oyun olmasına baxmayaraq, komandamız ikinci yarıda taktiki cəhətdən yaxşı oyun göstərdi. Bu komanda ilə nəticə vermək olar. Çalışacağıq ki, Premyer Liqada yerimizi qoruyaq.
– Sizin “İmişli”yə baş məşqçi təyin olunmağınız tənqidlərə səbəb oldu. Bir çoxları deyirdi ki, Premyer Liqaya yeni çıxan komandanın əcnəbi baş məşqçi gətirməsi doğru deyil. Bu tənqidlərdən xəbəriniz var?
– Çox məlumatım yoxdur. Tənqidlərlə maraqlanmıram. Bütün diqqətim məşqlərdədir. Komandanı daha da güclü etməyə çalışıram. “Turan Tovuz” çempioinluğa oynamaq istəyir. Onlara qarşı yaxşı oyun göstərdik. Bu da onu göstərir ki, baş məşqçinin taktikası işləyir.
– Komanda İmişlini təmsil etsə də, Bakıda məskunlaşıb. Ev oyunlarını Şamaxı və Qubada keçirəcək. Bu situasiyanı necə şərh edərdiniz?
– Bu problemlərin olmasına baxmayaraq, bizim işimiz komanda ilə ilşəməkdir. Biz də istəyərdik ki, öz şəhərimizdə oynayaq. Bu işlərin həlli ilə rəhbərlik məşğul olur. Bizim işimiz komandanı oyunlara hazırlamaq və gücləndirməkdir.
