30 il əvvəl ilk oyunda meydana çıxanlar - İndi hardadırlar?
Bu gün millikomandamızın ilk oyunundan 30 il keçir. Gürcüstana səfərdə 3:6 hesabı ilə məğlub olan futbolçular indi hardadır, nə işlə məşğul olurlar?
Msport.az Gürcüstana qarşı oynayan futbolçuları yada salır.
Dmitri Kramarenko – Oyun vaxtı 18 yaş. İndi 48 yaşı var.
Kramarenko hazırda Rusiyanın ÇSKA klubunda qapıçılarıa işləyən məşqçidir. O, bir ara eyni işi milli komandamızda da görsə də, sonradan yalnız bir yerdə işləməli oldu.
Aydın Ələkbərov – Oyun vaxtı 26 yaş. İndi 56 yaş.
Karyerasını bitirdikdən sonra yan xətt hakimi kimi fəaliyyət göstərən Aydın Ələkbərov çoxdandır böyük futbolda olmasa da, uşaq məşqçisi bildiklərini gənc nəsilə öyrədir.
Elşad Əhmədov – Oyun vaxtı 22 yaş. İndi 52 yaş.
Vaxtı ilə bir neçə klubumuzda işləmiş Elşad Əhmədovun baş məşqçi karyerası istənilən kimi alınmadı. Qısa müddət “Neftçi”ni də çalışdırmış mütəxəssisə artıq bir ildir ki, bu klubda Akademiyanın koordinatoru vəzifəsi tapşırılıb.
Tərlan Əhmədov – Oyun vaxtı 21 yaş. İndi 51 yaş.
Tarixi görüşün iştirakçılarından biri də 90 dəqiqə meydanda olan Tərlan Əhmədovdur. Tərlan müəllimin indi “Kəpəz”də o qədər işləri var ki, bəlkə də bu günü xatırlamaq yadına da düşmür. O, Gəncə klubunu sonuncu pillədən və böhrandan çıxarmaq üçün əlindən gələni etməlidir.
Zaur Qarayev – Oyun vaxtı 24 yaş. İndi 54 yaş.
“Qarabağ”ın sabiq müdafiəçisi Mingəçevir futbolunun ən yaxşılarından sayılır. Bir neçə il I divizionda Mingəçevir təmsilçisinin baş məşqçisi olan Zaur Qarayev elə indi də bu şəhərdə yaşayır.
Emin Ağayev – Oyun vaxtı 19 yaş, İndi 49 yaş.
Emin Ağayev son dəfə Aftandil Hacıyevin “Səbail”də köməkçilərindən biri idi. Ancaq Hacıyevin baş məşqçi postundan istefaya göndərilməsindən sonra o, da klubdan ayrılmalı oldu. Ağayev Rusiyada ən çox çıxış etmiş futbolçularımızdandır.
Mahmud Qurbanov – Oyun vaxtı 19 yaş. İndi 49 yaş.
Mahmud Qurbanovun “Səbail”də işləri hələ ki yaxşı getmir. Onun komandası dünən də “Neftçi”yə uduzdu. Belə davam edərsə, keçmiş “7” nömrə istefaya göndərilə bilər.
Şahin Diniyev – Oyun vaxtı 26 yaş. İndi 56 yaş.
Şahin Diniyev AFFA Məşqçilər Komitəsində fəaliyyət göstərir. Millimizin sabiq baş məşqçisi Tərlan Əhmədovdan öncə “Kəpəz”dən təklif alsa da, o, Gəncə klubunu çalışdırmaqdan imtina etdi.
Vidadi Rzayev – Oyun vaxtı 25 yaş. İndi 55 yaş.
Vidoş “Kəpəz”də köməkçi məşqçilərdən biridir. Rzayev Yaşar Vahabzadənin korpusunda da yer alsa da, Tərlan Əhmədov gəldikdən sonra onu çıxarmadı.
Nazim Süleymanov – Oyun vaxtı 27 yaş. İndi 57 yaş.
Azərbaycan futbolunun əfsanəlirindən biri 1992-də olduğu kimi yenə də Rusiyadadır. Süleymanov bu yaxınlarda “Ximki” klubunun U-19 komandasının baş məşqçisi təyin olundu. Qeyd edək ki, bu klubun sahibi azərbaycanlı iş adamı Tufan Sadıqovdur.
Samir Ələkbərov – Oyun vaxtı 23 yaş. İndi 53 yaş.
Start heyətində iki qardaşlar – Samir və Aydın Ələkbərovlar meydana çıxmışdı. S.Ələkbərovun baş məşqçi kimi karyerası elə də uğurlu olmadı. Vaxtilə U-21-i çalışdırmış veteran hücumçu indi uşaq futbolundadır.
Sonradan oyuna daxil olanlar
Elxan Həsənov – Oyun vaxtı 25 yaş. İndi 55 yaş.
Elxan Həsənov bir neçə ildir ki, “Qarabağ”ın qapıçılarla iş üzrə məşqçisidir.
Vüqar İsmayılov – Oyun vaxtı 22 yaş. Hazırda 52 yaş.
Sumqayıt futbolunun yetirməsi olan Vüqar İsmayılovdan uzun müddətdir ki, səs-soraq yoxdur. Bunun səbəbi isə onun futbol sahəsində olmamasıdır. O, bir neçə ildir ki, Türkiyədə restoran biznesində çalışır.
Elman Sultanov – Oyun vaxtı 18 yaş. Hazırda 48 yaş.
Yayda “Neftçi”nin U-17 komandasından göndərilən Sultanov indi I divizionda işləyir. O, MOİK-də baş məşqçi Şəhriyar Məmmədovun köməkçisidir.
Qurban Qurbanov – Oyun vaxtı 20 yaş. İndi 50 yaş.
Təqdimata ehtiyaxı olmayan Qurban Qurbanovu hər kəs yaxşı tanıyır.
Kamil Bayramov – Oyun vaxtı 20 yaş. İndi 50 yaş.
Kamil Bayramov 1996-cı ildə “Neftçi”dən çıxıb Rusiyaya getdi və həyatını ora bağladı. O, bir neçə il “SKA Rostov” klubunda oynadı. “Neftçi”nin sabiq yarımmüdafiəçisi indi Rostov klubunun aşağı yaş qrupları üzrə komandasında işləyir.
Əhməd Ələsgərov – Oyun vaxtı 57 yaş. İndi vəfat edib.
“Neftçi”yə 1966-cı ildə bürünc medal qazandıran ləsgərov millimizin ilk oyununda baş məşqçi olub. Əhmət Lətifoviç 2015-ci ilin mayında Odessada vəfat edib və orda dəfn olunub.
