“Boka Xuniors”un futbolçusu axtarışa verildi
“Boka Xuniors”un futbolçusu Eduardo Salvio polis tərəfindən axtarışa verilib.
Msport.az “Ole”yə istinadən xəbər verir ki, Salvio keçmiş həyat yoldaşını avtomobillə vurub qaçmaqda ittiham olunur. Hadisə aprelin 14-də gecə saatlarında baş verib. Futbolçunun əvvəlki həyat yoldaşı onu maşında başqa xanımla görüb. Bu zaman avtomobilə yaxınlaşan xanım Salviodan şüşəni qaldırmasını istəyib. “Boka Xuniors”un oyunçusu buna məhəl qoymayınca, qadın maşının qarşısını kəsərək çəkilməyib.
Salvio çox düşünmədən mühərriki işə salaraq ayağını qaza basıb. Nəticədə, Salvionun keçmiş həyat yoldaşı maşının üstündən yerə yıxılıb. Xəstəxanaya çatdırılan xanım hazırda sağ ayağını tərpədə bilmir.
Eduardo Salvio isə hələ ki polisin axtarışlarından yayına bilib, onun harada olduğu bilinmir.
Qeyd edək ki, Salvio əvvəllər “Benfika”da çıxış edib. Öncə Lissabon klubunda icarə əsasında oynayan futbolçu sonradan “Atletiko”dan 11 milyon avroya transfer olunub.
