Ölkə prezidenti və xanımı türk atletləri təbrik etdi
Azərbaycan Prezidenti İlham Əliyev və 1-ci vitse-prezident Mehriban Əliyeva ağırlıqqaldırma üzrə Avropa çempionu olmuş Cansu Bektaşa və gümüş medal sahibi Qamze Altuna təbrik məktubu göndərib.
Msport.az xəbər verir ki, məktubda deyilir:
“Əziz Cansu və Qamze,
İrəvanda keçirilən ağır atletika üzrə Avropa çempionatında qızıl və gümüş medallar qazanmağınız münasibətilə Sizi səmimi-qəlbdən təbrik edirik.
Sizin yüksək ustalıq, əzmkarlıq və iradə nümayiş etdirərək dünya miqyasında Türkiyə bayrağını dalğalandırmağınız, İstiqlal Marşını səsləndirməyiniz bütün Azərbaycan xalqını sevindirdi.
Qələbələrinizi Azərbaycana həsr etdiyinizə görə Sizə xüsusi təşəkkür edirik. Bu, bir daha onu sübut etdi ki, Azərbaycan olmayan yerdə Türkiyə daim bizi təmsil edir və haqq işimizi dəstəkləyir. Bu, sarsılmaz Azərbaycan-Türkiyə qardaşlığının növbəti təzahürüdür.
Biz Sizinlə fəxr edir, bundan sonra da yeni-yeni qələbələr diləyirik”.
