Brahim Dias Mərakeş millisində çıxış edəcək
Brahim Dias Mərakeş millisində çıxış edəcək. Msport.az xəbər verir ki, jurnalist Lino Bakko bu məlumatı yayıb.
Onun sözlərinə görə, “Milan”da icarədə olan “Real”ın futbolçusu Mərakeş yığmasının martın 20-dən 28-ə kimi keçiriləcək təlim-məşq toplanışına qatılacaq.
23 yaşlı hücumçu İspaniyanın Malaqa şəhərində anadan olsa da, onun valideyinləri Mərakeş əsillidir. Brahim İspaniyanın aşağı yaş qrupları üzrə milli komandalarında oynayıb. Bundan başqa, o, 2021-ci ildə Litva ilə yoldaşlıq oyununda forma geyinib. Hücumçu həmin matçda fərqlənsə də, sonradan yığmaya dəvət almayıb.
Dias bu mövsüm A seriyasında 17 oyunda 4 qol vurub və 3 məhsuldar ötürmə verib.
ANAR ABDULLAYEV
