"İnanıram ki, "Neftçi" daha yuxarılarda olacaq" - Elvin Camalov
“Neftçi”nin yeni transferi Elvin Camalov klubun mətbuat xidmətinə açıqlama verib. Msport.az xəbər verir ki, “Sabah”dan gələn dayaq yarımmüdafiəçisi komandasının uğurları üçün əlindən gələni edəcəyini deyib:
“Neftçi” kimi tarixi zəngin olan və böyük klubda olmaq sevindiricidr. Əlbəttə, çox həyəcanlıdır. Ümid edirəm ki, bu həyəcanı yenib komanda üçün faydalı olacam. İnanıram ki, “Neftçi” daha yuxarılarda olacaq. Komandanın üst sıralarda olması üçün əlimizdən gələni edəcəyik. Daha yaxşı nəticələr qazanmaq üçün komandada pay sahibi olmağa çalışacam. Hər bir futbolçunun arzusu var. Mən də arzuma nail olduğum üçün sevincliyəm. Burada olmaq böyük sevinc olduğu kimi böyük məsuliyyət də tələb edir. “Neftçi”də azarkeşlərin gözləntisi, istəyi daim yuxarılardır. Azarkeşlərə səslənirəm ki, dəstəyinizi əsirgəməyin.
“Neftçi” böyük camiadır. Uğurlara nail olacağıqsa, azarkeşlərlə bir yerdə nail olacağıq. Çempionatda hər oyunda 3 xal qazanıb daha yuxarı qalxmaq və kuboka sahib olaraq avrokuboklara getmək əsas məqsədimiz olacaq. Ümid edirəm ki, azarkeşləri yaxşı performansımla sevindirərəm”.
Qeyd edək ki, 4 nömrəli formanı geyinəcək 29 yaşlı dayaq yarımmüdafiəçisi ilə 1,5 + 1 il şərti ilə müqavilə bağlanıb.
