“Qarabağ”ın rəqibindən hücumçu transferi
“Qarabağ”ın UEFA Avropa Liqasının əsas mərhələsindəki rəqibi Niderlandın “Ayaks” klubu İngiltərə təmsilçisi “Bernli”dən Vaut Veqhorstu transfer edib.
Msoprt.az Erediviziya təmsilçisinin mətbuat xidmətinə istinadən xəbər verir ki, futbolçu ilə 2026-cı ilin yayına kimi müqavilə imzalanıb.
32 yaşlı niderlandlı hücumçu yeni klubunda 25 nömrəli formanı geyinəcək.
Ötən mövsüm Almaniyanın “Hoffenhaym” klubunda icarə əsasında çıxış etmiş forvard bütün yarışlarda 30 matçda iştirak edib, 7 qol vurub, 4 məhsuldar ötürmə edib. V.Veqhorst bu mövsüm İngiltərə çempionatında cəmi iki oyun keçirib.
Qeyd edək ki, “Qarabağ” “Ayaks”la sentyabrın 25 və ya 26-sı Bakıda üz-üzə gələcək.
