“Elçin Məsiyevin verdiyi qərarlar məni belə qıcıqlandırırdı”
“Maraqlı oyun alındı. Hər iki komanda bir-birinə layiqli mübarizə apardı. Meydanda daha çox mübarizənin şahidi olduq. Hər iki komanda qalib gələ bilərdi. Şans “Zirə”nin tərəfində oldu”.
Msport.az xəbər verir ki, bu sözləri “Qəbələ”nin baş məşqçisi Elmar Baxşıyev Premyer Liqanın 13-cü turunun “Zirə” ilə oyunundan sonra keçirilmiş mətbuat konfransında deyib. O, jurnalistlərin suallarını da cavablandırıb.
– Bir neçə real qol epizodunu əldən verdiniz…
– Qol çatmadı. Oyunu dəyişmək üçün qol vurmalısan. Çempionatın ən çox hücumda olub, ən az qol vuran komandasıyıq. Bu özü bizə siqnal verir ki, çoxsaylı epizodlara giririk, amma reallaşdırmaqda çətinlik çəkirik. Sonuncu yerdəyik. Danışmaq yox, işləmək lazımdır ki, nəyisə dəyişə bilək. Komandamdan razıyam. Amma hakimlik bərbad idi, hər epizodda futbolu çirkinləşdirməyə çalışırdı.
– Bu mövsüm 9-cu məğlubiyyətiniz oldu. Uğursuzluq zolağından çıxmaq üçün nə edəcəksiz?
– Qol vurmaq, qələbə qazanmaq lazımdır. Neçə turdur qol vurmuruqsa, qalib gəlmək mümkün deyil. Analiz edirik ki, nəyə görə həmin epizodlar qolla nəticələnmir. Bu gün bərabər səviyyəli oyun getdi.
– Bir mövsüm kuboku qazanıb, digərində liqanı tərk etməyi seçərdiz, yoxsa necə?
– Mən performansımızı mövsümlərə bölmürəm. Çünki ötən mövsüm başqa komandamız var idi. Qarşımıza qoyulan hədəflərə çatdıq. İndi isə yeni komandamız var, sonuncuyuq. Daha çox çalışıb sonuncu pillədən qurtulmaq lazımdır.
– Son 15 dəqiqədə komandanız aqressiv görünürdü. Qalan dəqiqələrdə niyə həmin aqressivlik yox idi?
– Səbəbini indi deyəcəm sizə. İkili mübarizə gedir və birinci epizodda hakim oyunçumuza sarı vərəqə göstərir. Dördüncü hakim çağırır ki, “Zirə”nin oyunçusuna da sarı vərəqə göstər, baş hakim bunu etmir. Futbol elədir ki, ya mübarizəyə imkan verməlisən. Elçin Məsiyev bu gün göstərirdi ki, bir komandanı qoruyuram, digərini necə istəyirəm əzirəm. Futbolçular da sonda istəklərini göstərməyə başladı.
– Bəxtiniz gətirmədi, yoxsa hakimlərin səhvinə görə uduzduz?
– Nəinki özümüzə, heç bir komandaya qarşı belə hakimlik arzulamaram. Hamı məni təmkinli adam kimi tanıyır. Ancaq Elçin Məsiyevin verdiyi qərarlar məni belə qıcıqlandırırdı. (Sportal)
