Filipe Paxtman: "Bu çətin mərhələni keçib, yenidən oynamaq istəyirəm"
“Zirə”nin braziliyalı hücumçusu Filipe Paxtmanın Msport.az saytına müsahibəsi
– Yenicə formaya düşürdünüz ki, yenə zədələndiniz. Belə tez- tez sıradan çıxmağınız nə ilə bağlıdır?
– Uzun müddət oyunlardan kənarda qaldım. Fikrimcə, əsas səbəb budur. İdeal fiziki formamı bərpa etmək üçün öz üzərimdə çox çalışmalıyam.
– Bəlkə Premyer Liqada rəqiblər sizə qarşı çox kobud oynayırlar…
– Mən belə düşünmürəm. Rəqiblər meydanda bir futbol oyununda nəzərdə tutulmuş zəruri olan nə varsa, onu edirlər.
– Hazırda zədə ilə bağlı durumunuz necədir?
– Günü-gündən daha yaxşı oluram. İnanıram ki, tezliklə sıraya qayıdacağam.
– Tez-tez zədələnməyinizə baxmayaraq, Rəşad Sadıqov hələ də inanır ki, siz öz potensialınızı tam açacaqsınız. Bəs özünüz necə, özünüzə bu qədər inanırsınız?
– Təbii ki. Mən də buna inanıram. Çünki yaşım azdır. Gələcəkdə daha yaxşı işlər görə bilərəm.
– Bu cür zədələr sizi psixoloji cəhətdən yormur?
– Futbolun ən pis tərəfi zədələrdir. Bu çətin mərhələni adlayıb, heç bir narahatlıq hiss etmədən yenidən oyunlarda çıxış etmək istəyirəm.
– “Zirə” nin bu mövsümkü çıxışını necə dəyərləndirirsiniz?
– Yaxşı komanda olduğumuz qənaətindəyəm. Məqsədlərimiz üçün mübarizə aparmaq iqtidarındayıq.
– Qarşıda “Neftçi” ilə Azərbaycan Kubokunda 1/4 finalın cavab matçı var. Bu oyundan nə gözləyirsiniz?
– Bizi olduqca çətin qarşılaşma gözləyir. Ammma əlimizdən gələnin ən yaxşısını etdiyimiz halda, bu oyundan qələbə ilə ayrıla bilərik.
– Braziliyanın dünya çempionatında 1/4 finalda vidalaşması barədə nə deyə bilərsiniz?
– Həmişə Braziliyanın dünya kubokunu qazanmasını istəmişəm. Keyfiyyətli futbolcularımız var. Amma mübarizəni dayandırdıq. Buna görə təəssüflənirəm.
