"Bu gün susmaq lazımdır" - Azər Bağırov
Kəpəz” Azərbaycan Premyer Liqasının 9-cu turunda “İmişli”yə 0:3 hesabı ilə məğlub olub.
Msport.az xəbər verir ki, Qəbələdəki oyundan sonra Gəncə təmsilçisinin baş məşqçisi Azər Bağırov jurnalistlərin suallarını cavablandırıb:
– Çox ağır məğlubiyyətdir. Qırmızı vərəqəyə qədər pis oynamadıq. Bəzi epizodlarda nələrsə alınırdı. “Qırmızı”dan sonra bütün oyun planımız pozuldu.
– Ötən tur 10 nəfər nəfərlə qalan “Şamaxı”nı məğlub etdiniz, bu gün isə azlıqda qalıb məğlub oldunuz. Belə demək olar ki, əvvəlki matçdakı qələbə təsadüfi idi?
– Bəlkə də sual doğru deyil. Bu, futboldur. “Şamaxı”da rəqib qırmızı vərəqə alanda biz hesabda öndə idik. Bu gün ilk 25 dəqiqədə komanda pis deyildi.
– İkinci və üçüncü qollar yaxın küncdən vuruldu. Qapıçının performansını necə dəyərləndirirsiniz?
– Şərh etməyə ehtiyac yoxdur. Çox şey haqda danışmaq olar. Amma bu gün susmaq lazımdır. Qışa qədər mümkün olduğu qədər çox xal toplamalıyıq.
– Qışda yeni qapıçı transferi gözlənilir?
– Hər şey ola bilər, düşünəcəyik.
– Qapıçı seçiminizdə xüsusi səbəb var idi?
– Xüsusi bir səbəb yoxdur. Məşqə yanaşma, intizam qaydalarına görə seçim edirik. Qapıçı məşqçisi ilə də məsləhətləşirik. Spontan qərar deyildi. Həftəlik məşqlərdə diskusiyalar aparırıq.
