Fernandu Santuş: "Azərbaycan futbolunun gələcəyini dəyişməliyik"
Azərbaycan milli komandası UEFA Millətlər Liqasının qrup mərhələsinin II turu çərçivəsində sabah Koşitse Futbol Arenasında Slovakiyanın qonağı olacaq.
Prosport.Az xəbər verir ki, yığmamızın baş məşqçisi Fernandu Santuş oyundan öncə keçirilən mətbuat konfransında açıqlama verib:
“Biz bütün oyunlara qələbə üçün çıxırıq. Azərbaycan futbolunun gələcəyini dəyişməliyik. Bunun üçün inkişaf etməliyik. Doğrudur, Slovakiya yığması üzərində qələbəmiz olub. Lakin keçmişi deyil, gələcəyi düşünməliyik.
Bizim üçün əsas məqam oyunçuların sabahkı görüşə konsentrasiya olmalarıdır. Rəqibə hörmətlə yanaşırıq, kifayət qədər güclü komandadır. Ancaq bundan çəkinmirik. Sabah meydana qələbə qazanmaq üçün çıxacağıq. Azərbaycan millisinə inandığım üçün bura gəlmişəm. Futbolçularımın keyfiyyətinə güvənirəm. Onların bu uzun yollda bütün çətinliklərin öhdəsindən gələcəklərinə inanıram. Bəhlul Mustafazadə zədəli olduğu üçün komandada yer almasa da, heyətimizdə yetərincə futbolçu var”.
