"Mahir Emreli lazımi səviyyəyə çatacaq" - Jelko Kopiç
“Emreli lazımi səviyyəyə çatacaq, amma bunun nə zaman baş verəcəyini söyləmək çətindir”.
Msport.az xəbər verir ki, bunu Zaqreb “Dinamo”sunun baş məşqçisi Jelko Kopiç millimizin üzvü Mahir Emrelinin durumu barədə yerli mətbuata müsahibəsində deyib.
45 yaşlı mütəxəssis bildirib ki, forvard uzun müddət komanda ilə məşqlərdən kənar qaldığı üçün hələlik ideal formasında deyil: “Burada bir neçə amil var: onun kluba, komanda yoldaşlarına, liqaya uyğunlaşması və sairə. “Dinamo”ya gəlib dərhal öz keyfiyyətini göstərmək asan deyil. Xüsusən də ən yaxşı formada deyilsənsə və komanda ilə hazırlaşmamısansa. Emrelinin keyfiyyətli futbolçu olduğuna əminəm. İnanıram ki, bunu meydanda göstərəcək və hər şey öz yerinə düşəcək”.
Qeyd edək ki, qış fasiləsində Polşa “Legiya”sından ayrılan Mahir Emreli “Dinamo” ilə 4,5 illik sözləşmə imzalayıb.
