"Neftçi" "Səbail"i məğlub etdi - VİDEO
Azərbaycan Premyer Liqasında XXVII tura start verilib.
Sportnet.az xəbər verir ki, ilk gündə bir oyun keçirilib.
Günün yeganə matçında “Neftçi” meydana çıxıb. “Ağ-qaralar” doğma “Neftçi Arena”da “Səbail”i qəbul edib.
Turnir cədvəlində qonşu olan komandaların duelinə ev sahibləri sürətli başlayıblar. Miodraq Bojoviçin yetirmələri fasiləyə qədər rəqib qapısından iki cavabsız top keçiriblər. Əvvəlcə 23-cü dəqiqədə “Səbail”in israilli müdafiəçisi Nir Bardea avtoqol müəllifi olub.
Cəmi 4 dəqiqə sonra bu dəfə “Neftçi”nin müdafiəçisi Azər Salahlı “səhnəyə çıxıb” və “dənizçilər”i ikinci dəfə mərkəzə dəvət edib. Qarşılaşmada son nöqtəni 85-ci dəqiqədə Yeqor Boqomolski qoyub.
Beləliklə, rəqibini 3:0 hesabı ilə məğlub edən “Neftçi” xallarının sayını 40-a çatdırıb. “Səbail” isə 37 xalda qalıb. Şahin Diniyevin baş məşqçisi olduğu komanda “Neftçi” önündə 5 illik qələbə həsrətinə son qoya bilməyib. “Səbail” bu rəqibini sonuncu dəfə 2019-cu ildə məğlub edib.
Qeyd edək ki, III dövrənin son turunun digər oyunları martın 16-17-də keçiriləcək.
Azərbaycan Premyer Liqası
XXVII tur
15 mart
19:00. “Neftçi” – “Səbail” – 3:0
Qollar: Bir Bardea, 23 (avtoqol). Azər Salahlı, 27. Yeqor Boqomolski, 85
Bakı, “Neftçi Arena”.
