"O, öz karyerasına zərbə vurdu" - Rəşad Sadıqov
“Zirə” Avropa Konfrans Liqası II təsnifat mərhələsinin ilk oyunu çərçivəsində Slovakiyanın “Dunayska Streda” klubunu qəbul edəcək.
Msport.az xəbər verir ki, meydan sahiblərinin baş məşqçisi Rəşad Sadıqov oyundan öncə təşkil olunan mətbuat konfransında jurnalistlərin suallarını cavablandırıb:
– Sabah növbəti oyunumuza çıxacağıq. Bu dəfə Konfrans Liqasında çıxış edəcəyik. Yaxşı komandaya qarşı mübarizə aparacağıq. Fərqli sistemi, fərqli oyun üslubu olan komandadır. Düşünürəm ki, azarkeşləri maraqlı oyun gözləyir. Var gücümüzlə hazırlaşmışıq. Çalışacağıq ki, ilk oyunda sərfəli nəticə qazanaq və səfər matçına üstün yollanaq. Cütün taleyi ikinci görüşdə həll olunacaq. Bu, rəqib üçün əlavə üstünlükdür. Amma biz əvvəlcə sabahkı oyunu fikirləşirik.
– Slovakiya komandaları ilə az qarşılaşmışıq. “Dunayska Streda” haqqında hansı fikirdəsiz?
-Baş məşqçiləri İspan mütəxəssisdir. 5-3-2 sistemi ilə oynayırlar. Fərqli sistemdir. Rəqibin oyunu haqda çox danışmaq istəmirəm. Amma onlar çox pressinq edən, rəqibi təzyiq altında saxlayan komandadır. Yaxşı futbolçuları var. Ən əsası da komanda şəklində oynayırlar. Bizim kimi heyəti qoruyub-saxlayıblar. Çox detallı şəkildə danışmaq istəmirəm. Hazırda məni öz komandam düşündürür. Rəqibin gücünü də nəzərə almalıyıq. Hazırlaşmağa vaxtımız az olub. Amma düşünürəm ki, oyunçularım hazırdır.
– Salifu Summanın addımı onun “Zirə”dəki taleyinə kölgə saldı?
– “Zirə”dəki yox, öz karyerasına kölgə saldı. Yaxşı başlamışdı. Mərhələni keçsəydik, Summaya da təkliflər ola bilərdi. Hansı futbolçular provakasiyaya gedirsə, onlarla danışırıq. Summa kimi ən sakit oyunçunun belə etməsi adama daha çox təsir edir. “Zirə”dəki karyerasına zərər olmayacaq. Amma öz karyerasına zərbə vurdu. Növbəti oyunlar üçün böyük dərs oldu. Bu tip oyunlarda qırmızı almağın acı fəsadlarını gördü.
– Ona cəza verildi?
– Çox cəza verməyin tərəfdarı deyiləm. Ən az cəza verən məşqçiyəm. Bu hadisə baş veribsə, cəza çox şeyi dəyişməyəcək. Hörmətsizliyi özünə və bizə qarşı etdi. Təbii ki, cərimə olacaq. Qırmızı kartlarla bağlı cərimə prinsiplərim var. UEFA-dan gələcək cəza futbolçuya kifayət qədər zərər vuracaqsa, bəsdir. Amma az olarsa, cəza verəcəyik. Bundan sonra 200 min də cərimə olsa, qırmızı vərəqəyə görə böyük uğuru əldən verdik. Əsas səbəb onu götürürəm.
– Rəqibi yaxşı təhlil edə bildiz?
-Ən gözəl analiz meydanda olacaq. İlk dəqiqələrdən sonra futbolçuların özü rəqibi hiss edəcəklər. Yaxşı istirahət etmişik. Çünki oyunçular 120 dəqiqə azlıqda oynadılar. Taktiki, texniki, fiziki cəhətdən hazırlaşmışıq. Əsas odur ki, planımız işləsin. Rəqibi “Şerif”lə müqayisə etsəm, daha təşkilatlanmış komandadır. “Şerif” daha çox fərdi ustalığa fikir verən komanda idi. “Dunayska”da oyunçular bir-birini tamamlayırlar. Möhkəm kollektivdir. Çalışacağıq ki, sabah qələbə qazanaq, üstünlük əldə edək.
– Rəqib beşli müdafiə ilə oynayırsa, siz də fərqli sistemdə oynayacaqsız? Start heyətində dəyişiklik olacaq?
– Danışsam, qarşı tərəfə məlumat vermiş olacam. Çalışacağıq ki, sabah ən ideal heyət olsun. Sonradan meydana daxil olanlara da önəm verirəm. Hansısa dəyişikliyə gedə də bilərik, getməyə də bilərik.
– “Şerif”lə matçda qazaxıstanlı baş hakimi gördükdən sonra “bizim hakimlər şükürlü imiş” deyə, düşündünüz?
– Mən həmişə hakimliyimizin səviyyəsindən razılıq etmişəm. Həmişə demişəm ki, hakimlərimiz yüksək səviyyəli oyunları idarə etməyə hazırdılar, bacarıqlıdlar. Bəzi hakimlərlə bağlı narazılığımız olub. Çünki səhvləri təkrarlayıblar. Elə səhvlər təkrarlanıb ki….Epizoda baxırsan, görürsən, amma fərqli qərar verirsən. Qazaxıstanla bizim hakimlərimizi müzakirə etmərəm. Bizim hakimlərimiz səviyyə olaraq, daha üstündür. “Şerif”lə oyunda uduzmuşuq, danışmaq çətindir. Danışacağın halda, bəhanə kimi görünəcək. Amma hakimin xeyli səhvləri oldu. Bu tip, bərabərsəviyyəli oyunda, özü də azlıqda qalan rəqib üçün hakim səhvləri böyük rol oynayır. Oyunun təkrarına baxdıqda, bunlar daha qabarıq görünür. Amma məğlub olmağımızın əsas səbəbi o deyil. Azlıqda qalmağımızdır. Komandamız hesabı qorumağı bacardı. Təhlükəli epizodlarımız daha çox idi, “Şerif” iki zərbə vurdu, qol oldu. Başqa təhlükəli qol epizodları yox idi. Həmin gün rəqibin günü idi. Hər şey onların xeyrinə oldu. Ona görə mərhələni onlar keçdi.
