"Oyun praktikasının yoxluğunun çətinliyini hiss edirdim" - Ruslan Abışov
“Zirə”nin müdafiəçisi Ruslan Abışovun Msport.az saytına müsahibəsi
– Təlim-məşq toplanışı necə keçir? Hazırlıq prosesi təcrübəli oyunçu kimi sizi qane edirmi?
– Hər şey plan üzrə davam edir. Yaxşı hazırlaşmaq üçün bütün şərait yaradılıb. Hər şey yüksək səviyyədədir.
– Antalyadakı ilk yoxlama oyununda Rumıniyanın “Kindia” klubunu məğlub etdiniz? Nəticə və oyun barədə nə deyə bilərsiniz?
– Yaxşı oyun alındı. Hava şəraiti ağır olsa da, maraqlı qarşılaşma keçdiyini düşünürəm.
– Meydana start heyətində çıxmışdınız. Öz oyununuzdan razı qaldınız?
– Oyun praktikasının yoxluğunun çətinliyini hiss edirdim. Matçın videoyazısına baxanda bəzi epizodlarda bunu gördüm. Daha yaxşı oynaya bilərdim.
– Yoxlama oyunlarında əsas heyətdə oynasanız da, rəsmi matçlarda daha çox ehtiyatda qalırsınız. Bu nə ilə bağlıdır və sizi narahat edirmi?
– Mənim vəzifəm daim formada qalmaq və etimad göstərildiyi zaman komandaya kömək etməkdir. Narahat deyiləm. Mənim oynayıb-oynamamağım önəmli deyil. Əsas komandanın uğurudur.
– Bu mövsüm karyeranızda axırıncı olacaq, yoxsa davam etmək istəyirsiniz?
– Hələ bu barədə fikirləşməmişəm. Bu mövzu barədə danışmaq mənə çətindir.
– Bir neçə gün öncə qardaşınız Sərxan İbrahimoğlu Feysbukda fotonuzu paylaşaraq “Futbol səndən doydu, sən futboldan doymadın” yazmışdı. Həqiqətən belədir?
– Qardaşım da görür ki, mən istənilən ən adi məşqə hansı səviyyədə hazırlaşıram. Hər dəfə mənə deyir ki, istirahətinə fikir versən, daha yaxşı olar. Amma bu, məndən asılı deyil.
– Karyeranızı bitirəndən sonra da futbol sektorunda qalıb işləyəcəksiniz?
– Onu zaman göstərəcək. Futbolsuz çətin olar.
– Gələcəkdə özünüzü məşqçi, yoxsa klub prezidenti və ya idarəçi kimi görürsünüz?
– Məşqçi olmaq istəmirəm. Bunun müəyyən səbəbləri var. Digər variantlar da asan deyil. Gələcəkdə bu barədə dəqiq nə isə danışmaq olar.
– “Zirə”nin bu mövsüm mükafatçılar sırasına düşüb avrokuboklara vəsiqə qazanmaq şanslarını necə dəyərləndirirsiniz?
– “Zirə” hər il olduğu kimi bu mövsüm də iddialıdır. Mükafatçılar sırasında olacağımıza bütün komanda olaraq inanırıq.
