“Qarabağ”ın 80-ci böyükhesablı ev qələbəsi
“Qarabağ” Azərbaycan çempionatlarında 80-ci böyükhesablı ev qələbəsini qazanıb.
Msport.az Peşəkar Futbol Liqasının rəsmi saytına istinadən xəbər verir ki, bu, Premyer Liqanın XXI turuna təsadüf edib.
Ağdam klubu “Səbail”ə 5:1 hesabı ilə qalib gəlib. “Qarabağ” 1992-ci ildən təşkil olunan yarışda bunadək 79 ev görüşündə 3 və ya daha çox top fərqi ilə qələbə qazanmışdı.
Komandanın evdəki ilk belə qələbəsi 1992-ci ilə təsadüf edib. Mayın 6-da keçirilmiş II tur qarşılaşmasında Ağdam təmsilçisi Kürdəmir “Şirvan”ını 6 cavabsız qolla məğlubiyyətə uğradıb.
Qeyd edək ki, ötən tur “Zirə”ni rəqib meydanında 3:0 hesabı ilə yenən “Qarabağ” səfərdə 40-cı dəfə böyükhesablı qələbəyə sevinib.
