"Qarabağ" zəif deyildi, biz onları çətinə saldıq" - İsnik Alimi
“Qəbələ”nin albaniyalı yarımmüdafiəçisi İsnik Aliminin Msport.az saytına müsahibəsi
– Azərbaycan Kubokunun 1/4 final mərhələsinin cavab oyununda “Qarabağ”ı minimal hesabla məğlub edərək, sensasiyaya imza atdınız və yarmfinala adladınız. Bunu necə bacardınız?
– Hər iki tərəfin ifasında yaxşı oyun alındı. Çətin olacağı əvvəldən bəlli idi. Amma eyni zamanda bilirdik ki, inam və əzmkarlıq hesabına qələbə qazana bilərik.
– Görüşdən öncə “Qarabağ”a qalib gələcəyinizi desəydilər, inanardınız?
– Əlbəttə. Düşünürəm ki, inam olmayan yerdə qələbə də mümkün deyil. İnamsızlıq oyunu əvvəldən uduzmaq deməkdir. Bu, çox önəmli amildir.
– “Qarabağ”ın bu qədər zəif oynayacağını gözləyirdiniz?
– “Qarabağ” zəif deyildi. Son 3 oyunda göstərdik ki, onlara qarşı oynaya bilərik. Rəqibi çətin vəziyyətə saldıq və qalib gəldik.
– Son 11 gündə “Qarabağ”la 3 oyun keçirmisiniz. Bu amil heç bir çətinlik yaratmadı?
– Əlbəttə, çətin oldu. Çünki “Qarabağ”la matçlarda çox enerji sərf etdik və bərpa olunmaq üçün kifayət qədər vaxtımız olmadı.
– Yarımfinalda rəqib “Səbail” olacaq. Bu rəqiblə oyunlardan nə gözləyirsiniz?
– Bizi çox ağır matçlar gözləyir. Çünki yarımfinalda favorit və ya zəif rəqib olmur. Daha ciddi hazırlaşmalıyıq ki, finala adlayaq.
– Azərbaycan Kubokunda hədəf nədir?
– Təbii ki, kuboku qazanmaq istəyirik. Hər şey bu qədər sadədir.
– İlin son oyununda Premyer Liqada “Turan Tovuz”u qəbul edəcəksiniz. Kubokdakı qələbə növbəti matç üçün stimul ola bilərmi?
– “Turan Tovuz” yaxşı komandadır və bunu öz oyunu ilə göstərir. Çətin oyun olacaq. Yaxşı dincəlməli, bərpa olunmalı və bu görüşə ciddi hazırlaşmalıyıq. Bundan sonra isə meydana çıxıb qalib gəlmək lazımdır.
