Qurban Qurbanov: "Rəqib güclüdür, amma biz hazırıq"
“Sabah dünyanın ən güclü çempionatında iştirak edən kluba qarşı mübarizə aparacağıq”.
Msport.az xəbər verir ki, bunu “Qarabağ”ın baş məşqçisi Qurban Qurbanov İngiltərədə “Tottenhem”ə qarşı keçirəcəkləri UEFA Avropa Liqasının Liqa mərhələsinin I tur oyunundan öncə təşkil olunan mətbuat konfransında deyib.
52 yaşlı mütəxəssis çətin qarşılaşma gözlədiklərini bildirib: “Tottenhem” hər zaman İngiltərə Premyer Liqasında liderlər sırasında qərarlaşıb. Bununla belə, oyuna hazırıq. Çox düzgün, səliqəli və intizamlı oynamalıyıq. “Tottenhem”in stadionda və onların azarkeşləri qarşısında mübarizə aparmaq bizim üçün böyük təcrübə olacaq. Belə oyunlar hər bir futbolçumuzun böyüməsi üçün təcrübə sayılır. İnşallah, sabah futbolçularım böyük güc sərf edərək, yaxşı oyun nümayiş etdirəcəklər”.
Qeyd edək ki, “Tottenhem” – “Qarabağ” oyunu sentyabrın 26-da, Bakı vaxtı ilə saat 23:00-da start götürəcək.
