Azərbaycanlıların Qurban Qurbanov sevgisi
Rusiyanın “Matç” TV kanalı İnstaqram səhifəsini qaldırmaq üçün müxtəlif yollara əl atır. İndi də federal televiziyanın sosial media bölümü instaqramda müxtəlif ölkələrin “Rusiya Premyer Liqasında oynamış ən yaxşı futbolçusu kimdir” adlı sorğu keçirir.
Qurban Qurbanov Azərbaycanı RPL-də təmsil etmiş ən yaxşı futbolçu sayılıb. Təbii ki, respondentlərin sorğusuna əsasən. Amma iş orasındadır ki, Qurbanov “Fakel” yüksək liqaya vəsiqə qazandıqdan sonra Voronej klubunda çox az oynayıb. Onun Rusiyadakı əsas uğurları I dəstədə Stavropol “Dinamo”sunda olub. Hücumçu 1998-ci ildə İ divizionda 17 qol vurub.
Halbuki səsvermənin yarımfinalında uduzub mübarizəni dayandıran Nazim Süleymanov, daha əvvəl “sıradan çıxan” Vəli Qasımov, Dmitri Kramarenko kimi futbolçuların Rusiyada daha böyük nailiyyətləri olub. Süleymanov “Alaniya”nın heyətində Rusiya çempionatının qızıl medalını qazanıb, Qasımov Moskva “Dinamo”sunda 16 qolla ilk mövsümün bombardiri olub və “Betis”ə transfer edilib.
13 il millimizin qapısını qoruyan Kramarenko isə Rusiya çempionatının gümüş medalını qazanıb.
Bir daha əmin olduq ki, sosial şəbəkələrdəki bu tipli sorğular subyektiv xarakter daşıyır. Sosial şəbəkələrdə daha çox gənc nəslin nümayəndələri olduğundan onlar Vəli Qasımovun “Torino”ya, Nazim Süleymanovun “Liverpul”a qarşı oyunlarını xatırlamırlar. Bu, bilirsiniz nəyə oxşayır?
Ölkəmizdəki əksər azarkeşlər futbola yeni-yeni baxarkən, “Qalatasaray” 2000-ci ildə UEFA kubokunu qazandı. O vaxtdan da həmin yeniyetmələr oldular “Qalatasaray” sevdalısı. İndi bu cür sorğuda iştirak edənlər də Qurbanovun məşqçi, Şeydayevin isə futbolçu kimi “Qarabağ”kı fəaliyyətinin şahidi olublar. Halbuki bir az araşdırsalar, görərlər ki, Şeydayev Rusiyada az-maz “Krılya Sovetov”da oynadı, “Dinamo”da isə karyerası istənilən kimi alınmadı.
Bu cür sorğular həm də hər hansı bir insana olan sevginin dərəcəsini müəyyənləşdirmək baxımından maraqlıdır. Azərbaycanda azarkeşlər Qurbanovu dəlicəsinə sevirlər. Hətta o dərəcədə sevirlər ki, “İspaniyada çıxış edən azərbaycanlı futbolçu kim olub” sualı qoyulsa, əminəm ki, cavablar içində Qurbanov soyadı da olacaq.
Bizim insan sevərkən dəlicəsinə sevir, baxmadan, araşdırmadan, yoxlamadan.
AYXAN
