Bir şəklin tarixçəsi - Millimiz Kiprdə Estoniyaya qarşı
Vaxtilə milli komandamız və “Neftçi”də çalışmış, son illər BƏƏ-də müxtəlif klublarda idman massajisti kimi işləyən Faiq Hüseynovun sosial şəbəkədəki paylaşımı diqqətimi cəlb etdi. Fotoda yığmanın Nazim Süleymanov, Elxan Həsənov, Tərlan Əhmədov, Rasim Abuşov kimi veteranları ilə yanaşı Mirbağır İsayev, Aslan Kərimov, Rüfət Quliyev də var.
Kişik araşdırmadan sonra məlum oldu ki, şəkil 1997-ci ildə Kiprin Larnaka şəhərində Estoniya ilə yoldaşılıq oyunundan əvvəl çəkilib. 1997-ci il martın 1-də yığmamız Kiprdə Estoniya ilə qarşılaşmışdı. Həmin vaxt baş məşqçi Vaqif Sadıqov bir qədər eksperimental heyətə şans verib.
Estoniya – Azərbaycan 2:0
Qollar: Marko Kristal, 35, İndrek Zelinski, 76.
Azərbaycan: Elxan Həsənov, Emin Ağayev, Aslan Kərimov (Samir Xairov, 76), Mirbağır İsayev, Rüfət Quliyev, Tərlan Əhmədov (Faiq Cabbarov, 18), Rasim Abuşov, Mahmud Qurbanov (Ramiz Məmmədov, 60), Vyaçeslav Lıçkin (Ruslan Musayev, 80), Qurban Qurbanov, Nazim Süleymanov.
Kristal və Zelinskinin 35 və 76-cı dəqiqələrdə vurduğu qollarla pribaltikalılar bu qarşılaşmadan 2:0 hesabı ilə qalib ayrılmışdılar.
18-ci dəqiqədə əzələsi dartıldığı üçün oyunu davam etdirə bilməyən Tərlan Əhmədovun əvəzinə meydana Faiq Cabbarov daxil olub. Hazırda “Kəpəz”i çalışdıran Əhmədov estonlarla görüşü belə xatırlayır:
“Heyətdə Yunis Hüseynov, Vidadi Rzayev yox idi. Vaqif Sadıqov bir qədər eksperimental heyət aparmışdı Kiprə. Rüfət Quliyev və Mirbağır İsayev milliyə yeni-yeni cəlb olunurdular. Dumanlı xatırlayıram ki, oyunun əvvəlində əzələm dartıldı, ona görə əvəzləndim. Belə stadionlar Kiprdə olurdu adətən, ya da İranda. İranda təlim-məşq toplanışında da Nazim Süleymanov bizimlə olmayıb. Estoniyada isə o dövrdə stadionlar yaxşı olurdu, ot örtüyü”.
Estoniyaya qarşı görüşün digər iştirakçısı Aslan Kərimov da oyunu çətinliklə xatırlayır: “Dəqiq bildiyim odur ki, Vaqif Sadıqovun heyətidir. Kiprdə yoldaşılıq oyunundan əvvəl çəkilmiş fotodur. Düzü, görüş tam yadıma düşmür. Amma indi dediniz, Kiprdə bəli, Estoniyaya qarşı oyundan əvvəl çəkilmiş fotodur”.
Qeyd edək ki, həmin il millimiz Kipr səfərindən sonra Türkmənistanla Bakıda və Aşqabadda iki yoxlama oyunu keçirdi – evdə 3:0 qələbə, səfərdə 0:2 məğlubiyyət. Avqustda isə Riqada Latviya ilə qolsuz bərabərə qaldı.
