"İstədiyimiz kimi oynasaq, "Qarabağ"a ciddi problemlər yarada bilərik" - "Ferentsvaroş"un baş məşqçisi
“Ferensvaroş” və “Qarabağ” oxşar komandalardır. Bu mənada şanslar bərabərdir.
Msport.az xəbər verir ki, bu sözləri Budapeşt klubunun baş məşqçisi Robbi Kin UEFA Çempionlar Liqasının pley-off mərhələsində evdə “Qarabağ”a qarşı keçirəcəkləri oyundan öncə mətbuat konfransında deyib.
İrlandiyalı mütəxəssis bildirib ki, özlərinə xas oyun üslubu ilə Azərbaycan çempionuna problem yarada bilərlər: “Bu iki görüşdə ən önəmlisi top buraxmamaqdır. Bilirik ki, bu mərhələdə zəif rəqib yoxdur. Getdikcə hər şey çətinləşir. Bura qədər gəlmək bizim üçün əla motivasiyadır. İstədiyimiz kimi oynasaq, “Qarabağ”a ciddi problemlər yarada bilərik”.
“Qarabağ”la oyunun önəminə diqqət çəkən baş məşqçi bu səbəbdən ölkə çempionatının son turunda əsas heyətin 10 futbolçusuna istirahət verdiyini vurğulayıb: “Mən oyunçularımın ürəklə mübarizə aparacaqlarını əminəm. Onlardan azarkeşləri ruhlandıracaq oyun göstərmələrini gözləyirəm”.
Robbi Kin “Ferensvaroş”un 3 il öncə Çempionlar Liqasının III təsnifat mərhələsində “Qarabağ”la keçirdiyi oyunları (1:1, 1:3) izlədiyini söyləyib: “Həmin matçlar tamam fərqlidir. İndi yeni futbolçular və baş məşqçi var. Geriyə baxmağı sevmirəm. Yeni çıxan heç bir “Ceyms Bond” filmi əvvəlki ilə eyni deyil”. (Azərtac)
Mütəxəssis “Qarabağ”la oyunlarda heyətlə bağlı dəyişikliklərin ola biləcəyini istisna etməyib.
