Paris-2024: Bu gün Azərbaycanın daha iki güləşçisi mübarizəyə başlayır
Azərbaycanın daha iki güləşçisi Fransanın paytaxtı Parisdə keçirilən Yay Olimpiya Oyunlarında mübarizəyə bu gün start verəcək.
Msport.az xəbər verir ki, ölkəmizin ən titullu qadın güləşçisi Mariya Stadnik (50 kiloqram) Almaniya idmançısı Anastasiya Blayvası sınağa çəkəcək. Yunan-Roma güləşçisi Sənan Süleymanov (77 kiloqram) isə Bolqarıstanı təmsil edən erməni güləşçi Aik Mnatsakanyanla qarşılaşacaq. Hər iki qarşılaşma 1/8 final mərhələsində baş tutacaq.
Bu gün, həmçinin 130 kiloqramda çıxış edən Sabah Şəriəti bürünc medal uğrunda görüşdə qüvvəsini sınayacaq.
Azərbaycan atleti Anna Skidan isə çəkicatma üzrə yarışın final mərhələsində mübarizə aparacaq.
Qeyd edək ki, hazırda Azərbaycanın aktivində üç medal var. Cüdoçular Hidayət Heydərov (73 kiloqram) və Zelim Kotsoyev (100 kiloqram) Olimpiya çempionu olublar, boksçu Alfonso Dominqes (92 kiloqram) isə finala vəsiqə qazanmaqla ən azı gümüş mükafatı təmin edib.
