Sumqayıtda Boks Təlim Mərkəzi fəaliyyətə başladı
Mehdi Hüseynzadə adına Sumqayıt şəhər stadionunda Boks Təlim Mərkəzi fəaliyyətə başlayıb.
Msport.az xəbər verir ki, “gənclik şəhəri”nin boksçuları burada ilk məşqlərinə çıxıblar.
ABF-in dəstəyi ilə inşa edilən mərkəzin ümumi sahəsi 1441 m2 təşkil edir və 3 mərtəbədən ibarətdir. Burada bufet, mətbəx və qeydiyyat otağı yer alır. İkinci mərtəbədə məşq zonası yerləşir. Həmçinin sauna, 2 soyunub-geyinmə otağı var və məşq üçün bütün idman ləvazimatları ilə təchiz edilib. Məşqçi, həkim və masaj otaqları üçüncü mərtəbədə yerləşir. Burada həmçinin trenajor zalı da var.
Boks Təlim Mərkəzinin direktoru Şahin İmranov bildirib ki, 1966-cı ildə Sumqayıt şəhər stadionu istifadəyə veriləndən burada boks bölməsi fəaliyyət göstərib. Pekin-2008 Yay Olimpiya Oyunlarının mükafatçısının sözlərinə görə, özü də məşqlərə məhz burada başlayıb: “1992-ci ildə Eldar Əbilovun rəhbərliyi altında boksun sirlərini burada öyrənməyə başlamışam. Sumqayıtın bir sıra titullu boksçuları da məhz burada yetişiblər və ölkəmizi beynəlxalq arenalarda uğurla təmsil ediblər. İnanırıq ki, biz də bunu inamla davam etdirəcəyik. Yaxşı perspektiv vəd edən idmançılar var”.
O, Boks Təlim Mərkəzində 12 məşqçinin çalışacağının nəzərdə tutulduğunu qeyd edib. Hazırlıqda isə eyni anda 25-30 yeniyetmə məşq edə biləcək.
İmranov beynəlxalq standartlara cavab verən ləvazimatlarla təchiz edilən idman ocağında ilk məşqin yüksək səviyyədə keçdiyini vurğulayıb: “Hazırlığa yenicə başlasaq da, Sumqayıtda boksa maraq yüksəkdir. İlk məşqdə yeniyetmələr arasında Avropa və dünya mükafatçıları da iştirak ediblər. Onların hər biri yaradılan şəraitdən razı qalıb”.
Direktor Boks Təlim Mərkəzin tezliklə ölkə idmanına böyük fayda verəcəyini deyib. Yığmanın da bazası olacaq mərkəzdə klublar da təlim-məşq toplanışı keçə biləcəklər.
Qeyd edək ki, oktyabrın 23-də Azərbaycan Respublikasının Prezidenti İlham Əliyev Mehdi Hüseynzadə adına Sumqayıt şəhər stadionunda yenidənqurmadan sonra yaradılan şəraitlə tanış olub. Dövlətimizin başçısına arenanın yardımçı binasında inşa edilən Sumqayıt Boks Təlim Mərkəzi barədə də məlumat verilib.
