Ayxan Abbasov: “Qarşımıza belə məqsəd qoymamışıq”
“Turan Tovuz”un baş məşqçisi Ayxan Abbasov Premyer Liqanın 24-cü turu çərçivəsində “Zirə”yə qarşı keçirdikləri oyunu şərh edib.
Msport.az xəbər verir ki, o, 0:2 hesabı ilə məğlub olduqları oyundan sonra baş tutan mətbuat konfransında bunları söyləyib:
“İddialı komandaların ustalıq səviyyəsi yüksəkdir. “Zirə” lazım olan dəqiqələrdə qol vurdu. Oyun baxımından narazılığım yoxdur. Bu gün bütün matç bizim üstünlüyümüzlə keçdi. Qol epizodlarından yararlana bilmədik və ucuz səhvlər etdik. Matçın ən kritik anında standart vəziyyətdən top buraxdıq. Bu da “Zirə”yə üstünlük gətirdi. Qarşıda oyunlar çoxdur. Həmin oyunlara hazırlaşacağıq.
Piruzi Marakvelidze son vaxtlar keçirdiyimiz uğurlu oyunların əsas memarlarından biri idi. Taktiki cəhətdən doğru oynayır. İstənilən oyunçu itkisi bizim üçün çətindir. Bu gün birinci hissədə pressinq edə bilməməyimizin səbəblərindən biri də son görüşdə çox yüksək tempdə çıxış etməyimiz və yorulmağımız oldu. Onun yerinə bir dağıdıcı oyunçu çıxış etməli idi. Bu işi Eltun Turabov yerinə yetirməli idi. Amma oyuna “düşə” bilmədi.
Bu il məqsədlərimiz başqadır. Avrokuboka vəsiqə qazansaq, daha yaxşı. Olmasa belə, bu, böyük itki sayılmayacaq. Çünki qarşımıza belə məqsəd qoymamışıq. Növbəti mövsüm iddialı olub-olmayacağımız sual altındadı. Çempionatda iddialı olmaq böyük büdcə tələb edir. 5-6 komanda var ki, yüksək yerlərə iddia edirlər. Bu gün onlarla mübarizə aparmağımız real deyil. Ancaq gələn mövsüm builkindən də yaxşı olmağa çalışacağıq. Rəhbərliklə danışıqlar gedir. Ümid edirəm ki, lazımi addımları atacağıq. İlk olaraq büdcə məlum olmalıdı ki, ondan sonra qarşımıza məqsəd qoyaq. Klub var ki, onun şəraiti, büdcəsi iddialı olmağı tələb edir. Biri də var, iddialılarla mübarizə aparmalısan. Kim deyir ki, motivasiyamız yoxdur? Avrokuboklara vəsiqə hədəfi qoymamışıqsa, o deməkdir ki, oyunlara uduzmağa çıxacağıq? 20 komandalı çempionatlar var. Belə çıxır ki, ilk “5-lik”dən aşağıdakılar desinlər ki, biz oynamırıq. Belə müqayisə aparmaq düzgün deyil. Hazır olanda biz də qarşımıza avrokuboka vəsiqə hədəfi qoyacağıq”.
