Kim harada oynayacaq? - Çempionatın matçlarını qəbul edəcək stadionlar
Bu gün Azərbaycan Premyer Liqasında 2022-2023-cü illər mövsümünə start verilir. Fövqəladə Hallar Nazirliyi Gəncə stadionunda oyunların keçirilməsinə icazə vermədiyindən “Kəpəz” “Zirə”ni “Dalğa Arena”da qəbul edəcək. Digər komandalar isə ev oyunlarını öz meydanlarında keçirə biləcəklər.
Msport.az bu mövsüm çempionatın matçlarını qəbul edəcək stadionları təqdim edir:
“Qarabağ”
“Azərsun Arena” (Suraxanı qəsəbəsi)
Tamaşaçı tutumu: 4677
İşıqlandırma sistemi: Var
Or örtüyü: Təbii
“Qarabağ” avrokubok matçlarını Tofiq Bəhramov adına stadionda keçirsə də, çempionat üçün kiçik “Azərsun Arena”da yetərlidir. Onsuz da Ağdam klubunun Premyer Liqadakı matçlarını ən yaxşı halda 1000 azarkeş izləyir. Stadionun 3 tərəfdən tribunaları var, bir tərəf isə ehtiyat meydançadır.
“Neftçi”
“Bakcell Arena” (8 km ərazisi)
Tamaşaçı tutumu: 10260
İşıqlandırma sistemi: Var
Ot örtüyü: Təbii
Dünən “Neftçi”nin “Rapid”lə oyununu izlədikdə gördük ki, qazon heç də ideal vəziyyətdə deyil. Ümumiyyətlə, yay aylarında arenada otla bağlı həmişə problem yaranır. Əgər “Neftşi” Konfrans Liqasında növbəti mərhələyə yüksəlsə, qazaon daha da yararsız hala düşə bilər.
“Zirə”
Zirə İdman Kompleksinin stadionu (Zirə qəsəbəsi)
Tamaşaçı tutumu: 1200
İşıqlandırma sistemi: Var
Ot örtüyü: Təbii
Bakıətrafı qəsəbə olan Zirənin stadionu kiçik olsa da, son vaxtlar bu arenanın dolduğunu xatırlamırıq. Ümumiyyətlə, bu təkcə “Zirə”yə yox, bütün klublarımıza xarakterik olan problemdir. Komanda ötən mövsüm bürünc mükafat qazanıb avrokuboklara vəsiqə qazansa da, azarkeşi çox azdır.
“Qəbələ”
Qəbələ şəhər stadionu (Qəbələ şəhəri)
Tamaşaçı tutumu: 3500
İşıqlandırma sistemi: Var
Ot örtüyü: Təbii
Qəbələ stadionunun ot örtüyü ölkəmizdə ən yaxşılardandır. Hətta qış aylarında qar yağmasına, güclü soyuq olmasına baxmayaraq qazon yenə də yamyaşı olur. Təəssüf ki, Qəbələdə də demək olar ki, 3500 nəfərlik idman qurğusu tam dolmur.
“Sabah”
“Bank Respublika Arena” (Masazır qəsəbəsi)
Tamaşaçı tutumu: 13000
İşıqlandırma sistemi: Var
Ot örtüyü: Təbii
“Sabah”ın yeni mövsümdən ASK Arena”ya köçəcəyi gözlənilsə də. Murad Musayevin komandası hələ də ev oyunlarını Masazırda keçirəcək. “ASK Arena”nın örtüyünün süni olması “Sabah”a orada oyunlar keçirməyə sərf etməz. Qazonu dəyişmək isə həm vaxt, həm də vəsait tələb edir.
“Sumqayıt”
“Kapital Bank Arena” (Sumqayıt şəhəri)
Tamaşaçı tutumu: 1517
İşıqlandırma sistemi: Var
Ot örtüyü: Təbii
Şərhçi üçün ən münasib olmayan stadionlardan biridir. Şərhçi nöqtəsindən demək olar ki, meydanı görmək mümkün deyil. Düzdür, Sumqayıtda yeni, müasir arena tikilir. Amma bu tikinti işləri xeyli vaxtdır ki, yubanır və nə zaman hazır olacağı bəlli deyil. Hər halda “Sumqayıt”ın hazırkı stadionu çox kiçikdir və bəzən heç də bütün azarkeşləri qəbul edə bilmir. Ona görə də komandanı yeni, daha böyük arenada görmək maraqlı olardı.
“Şamaxı”
Şamaxı şəhər stadionu (Şamaxı şəhəri)
Tamaşaçı tutumu: 2200
İşıqlandırma sistemi: Yoxdur
Ot örtüyü: Süni
“Şamaxı” yeni mövsümdə autsayder ola bilər. Əyalət klubu yeganə komandadır ki, heyətində legioner yoxdur. Lakin ötən mövsüm gördük ki, bu rayonda futbol sevilir və oyunlar zamanı arena demək olar ki, dolur. Stadionun yalnız bir tərəfdə tribunalarının olması estetik baxımdan elə də yaxşı görünmür. Stadionda işıqlandırma sistemi olmadığından matçları axşam saatlarına salmaq da mümkün deyil.
“Səbail”
“ASCO Arena” (Bayıl qəsəbəsi)
Tamaşaçı tutumu: 3200
İşıqlandırma sistemi: Var
Ot örtüyü: Süni
Bayıl stadionunun süni örtüyü pis vəziyyətə düşmüşdü. Artıq rəqib komandaların məşqçiləri, futbolçuları orada oynamağın qeyri-mümkün olduğunu deyirdilər. Bu mövsümün əvvəlində arenanın süni örtüyü dəyişdirildi. Amma yenə də örtük sünidir. Düzdür, bu dəfə daha müasir və yeni.
“Kəpəz”
“Dalğa Arena” (Mərdəkan qəsəbəsi)
Tamaşaçı tutumu: 6500
İşıqlandırma sistemi: Var
Ot örtüyü: Təbii
Gəncə azarkeşləri komandalarını doğma şəhərdə izləyə bilməyəcəklər. Stadion qəzalı vəziyyətdə olduğundan Fövqəladə Hallar Nazirliyi orada oyunların keçirilməsinə qadağa qoydu. “Kəpəz” rəqiblərini Mərdəkandakı “Dalğa Arena”da qəbul etməli olacaq. Əlbəttə ki, Gəncədən fərqli olaraq “Kəpəz” yetərincə dəstək almayacaq və rəqibləri üçün elə də təhlükəli olmayacaq.
“Turan Tovuz”
Tovuz şəhər stadionu (Tovuz şəhəri)
Tamaşaçı tutumu: 6500
İşıqlandırma sistemi: Yoxdur
Ot örtüyü: Süni
Yaxşı ki, “Kəpəz”dən fərqli olaraq “Turan Tovuz” ev oyunlarını doğma məkanda keçirə biləcək. Tovuzda futbol çox sevilir və əminik ki, hər görüşdə anşlaq olacaq. Stadionda işıqlandırma ilə bağlı problem olduğundan oyunları axşam saatına salmaq mümkün olmayacaq. Amma buna da şükür. Tovuz sakinləri “Qarabağ”, “Neftçi” kimi rəqiblərin oyununu yaxından izləmək imkanı qazanacaqlar.
