Mbappe, Jiru, Qrizmanndan sonra "Şamaxı"ya qarşı
Azərbaycan Premyer Liqsının V turunun “Şamaxı” ilə oyununda “Turan Tovuz”un heyətində daha bir futbolçu debüt etdi.
Msport.az xəbər verir ki, Xulu Siyanda 88-ci dəqiqədə Natan Oduvanı əvəzlədi. 30 yaşlı futbolçu Cənubi Afrika milli komandasının üzvüdür. Əslində Siyandanın maraqlı karyerası var.
O, bu il martın 29-da Fransa ilə yoldaşlıq oyununda (0:5) Mbappe, Jiru, Qrizmann, Kante, Varan kimi futbolçulara qarşı oynayıb. Ümumiyyətlə, Tovuz klubunun yeni legioneri CAR millisində 16 oyun keçirib, 1 qol vurub.
Siyanda karyerasına vətənində “Mamelodi Sandaunz” klubunda başlayıb. 2012-ci ildə “Rostov” 20 yaşlı gənc istedadı heyətinə qatır və müdafiəçi Rusiya Premyer Liqasında çıxış etməyə başlayır. Qeyd edək ki, “Mamelodi Sandaunz” futbolçusunun keçidinə görə “Rostov”dan 550 min avro tələb edirdi. Ruslar isə yalnız 450 min verə biləcəklərini bildirirdilər. Uzun sürən danışıqlardan sonra Siyanda nəhayət ki, Rusiyaya gələ bilir. Buna qədər isə 2010-cu ildə iki həftə “Arsenal”ın düşərgəsində baxışda olsa da, London klubu onunla müqavilə bağlamır.
“Rostov”da böyük rəqabət olduğundan Siyanda əsas heyətdə yerini möhkəmləndirə bilmir. O, 3 il ərzində bu komandada cəmi 34 oyunda meydana çıxır. 2015-ci ildə yenidən vətəninə qayıdan müdafiəçi CAR-ın ən populyar klubu “Kayzer Çifs”lə müqavilə bağlayır. Amma bu klubda da onun karyerası istədiyi kimi getmir. Heyətə düşməkdə çətinlik çəkən futbolçu “Maritsburq Yunayted”lə anlaşır.
3 il bu komandanın şərəfini qoruduqdan sonra 2020-də onun karyerasında “Hapoel Tel Əviv” dönəmi başlayır. İki il İsrail çempionatında stabil oynayan cənubi afrikalı futbolçu sonradan komandanın baş məşqçisi Kobi Refua ilə yola getmir və klubun düşərgəsini özbaşına tərk edir. Hətta “Hapoel Tel Əviv” FİFA-ya şikayət edəcəyini deyir. Klubun prezidenti İtsik Nisnov isə Siyandanın bir də ora ayağının dəyməyəcəyini bəyan edir.
Klubsuz qalan futbolçu daha az maaşla gəlib “Turan Tovuz”da çıxış etməyə razılıq verir. Xulu Siyanda əvvəlki formasını bərpa etsə, komandasına çox xeyiri dəyə bilər. Amma ola da bilər ki, o, Tovuzda da darıxıb Azərbaycandan tez ayrılsın.
