Nazarov Azərbaycana gələcək? - "Neftçi" çoxdan futbolçu ilə maraqlanır
Milli komandamızın üzvü Dmitri Nazarovun çıxış etdiyi “Ertsgebirge Aue” klubu Almaniya II Bundesliqasını tərk edib.
Msport.az xəbər verir ki, bu, komandanın 32-ci turda “Darmştad”a 0:6 hesabı ilə məğlub olmasından sonra rəsmiləşib. Karyerasında ilk dəfə aşağı liqaya düşən 32 yaşlı futbolçu Aue təmsilçisində qalıb III Bundesliqada oynayacaqmı? Hücumameyilli yarımmmüdafiəçi Almaniyada qalıb karyerasını aşağı liqada davam etdirməkdə maraqlı deyil. Əgər Nazarov II Bundesliqada yaxşı şərtlər təklif edən klub tapmasa, Azərbaycana gələ bilər.
Hələ bir müddət öncə futbolçu ilə “Neftçi”nin maraqlanması haqqında xəbərlər yayılmışdı. Bu mövsüm titulsuz qalan paytaxt klubu gələn çempionat üçün heyətini gücləndirməlidir. Həm də “ağ-qaralar”ın ölkə xaricində klubsuz qalan milli üzvlərini heyətə qatmaq təcrübəsi artıq var. Eddi İsrafilov nümunəsini misal çəkmək olar. Nazarov əvəllər Azərbaycana daha yüksək maaşla gələ biləcəyini gizlətmirdisə, indi “Ertsgebirge Aue”nin II Bundesliqanı tərk etməsi onun yumuşalmasına gətirib çıxara bilər.
