Şahin Diniyev "Kəpəz"in baş məşqçisi ola bilər
“Kəpəz” bu gün Yaşar Vahabzadənin istefasını açıqlayacaq. Bəs Gəncə klubunun yeni baş məşqçisi kim olacaq?
Msport.az-ın əldə etdiyi məlumata görə, Şahin Diniyev “Kəpəz”i çalışdırmağa əsas namizədlərdən sayılır. 56 yaşlı mütəxəssislə yanaşı ötən mövsüm “Səbail”in sükanı arxasında olan Aftandil Hacıyev və Tərlan Əhmədov da Vahabzadəni əvəzləməyə namizədlər arasında olublar. Hacıyevi xüsusən də ötən mövsüm onun rəhbərliyi altında paytaxt klubunda oynamış təcrübəli futbolçular arzulayır.
Amma Diniyevin 2015-2017-ci illərdə “Kəpəz”də işləməsi rəhbərliyin onun xeyrinə qərar verməsinə səbəb ola bilər. Hər halda o, Gəncə klubunda həm futbolçu, həm də məşqçi kimi işləyib və şəhəri, yerli mühiti yaxşı tanıyır.
Qeyd edək ki, “Kəpəz” 4 oyundan sonra xal toplaya bilməyib və turnir cədvəlində sonuncu yeri tutur.
