“Yerdə qırıq stul var idi, onu vurmuşam” - Vüsal İsgəndərli
“Sumqayıt”ın futbolçusu Vüsal İsgəndərli AFFA İntizam Komitəsi tərəfindən 1 oyunluq cəzalandırılmasına münasibət bildirib.
27 yaşlı yarımmüdafiəçi Msport.az saytına açıqlamasında qərarı başa düşmədiyini söyləyib.
O, heç bir oturacağı sındırmadığını vurğulayıb: “Yerdə qırıq stul var idi, ayağımla onu vurmuşam. Bu qədər. Daha oturacaqları sındırmaq nədir, ora yazıblar? Buna görə 1 oyunluq cəza verirlər? Daha əvvəl belə şey görməmişəm”.
İsgəndərli uduzduqları üçün əsəblərini cilovlaya bilmədiyini deyib: “Məğlubiyyəti həzm edə bilmədim. Onsuz da sınıq stul idi. Yəqin ki, apellyasiya veriləcək. Belə cəza harada görülüb”?
Qeyd edək ki, İntizam Komitəsi futbolçunun hərəkətinə görə klubu həm də cərimələyib.