"Belə davam etməsini istəmirəm" - Mahir Emreli
Milli komandamızın üzvü Mahir Emreli komandasının “Kontv”yə açıqlamasında “Konyaspor”dakı gələcək taleyindən danışıb.
Msport.az xəbər verir ki, transfer hüquqları Zaqreb “Dinamo”suna məxsus olan hücumçu Türkiyədə qalmaq istədiyini deyib:
” Yeni mövsümlə bağlı mənimlə görüş olmayıb. Müqavilə ilə Zaqreb “Dinamo”suna məxsusam. Amma “Konyaspor”un yeni mövsüm planlarında yer alsam, şad olaram.
“Burada hər şey mənim üçün çox gözəldir. Ölkələrimiz arasında mədəniyyət fərqi yoxdur. Bir millətik. Burada adaptasiya problemi yaşamadım. Bu səbəbdən Konyanı çox sevdim”.
Türkiyə Super Liqasının XXXIII turunda “Kayserispor”la 2:2 hesablı heç-heçə etdikləri ev oyunu barədə də fikirlərini bölüşən forvard matçın çətin keçdiyini söyləyib: “Həftə ərzində yaxşı hazırlaşmağımıza baxmayaraq, bəzi sürprizlərlə qarşılaşdıq. Bununla belə, maraqlı qarşılaşma oldu. Hər iki komanda 10 dəqiqə ərzində qollar vurdu. Konsentrasiyanı itirməməyimiz bizi çox sevindirdi. Qollar buraxsaq da, ruhdan düşmədik”.
Öz çıxışına da toxunan Emreli ilk dəfə “Konyaspor”dakı oyunundan narazı qalıb: “Buraya gəldiyimdən bu yana aktiv olmadığım matç keçirdim. Ümid edirəm ki, bu, sonuncu belə görüşüm olar. Çünki belə davam etməsini istəmirəm”.
Qeyd edək ki, Mahir Emrelinin “Konyaspor”la icarə müqaviləsi cari mövsümün sonunadək nəzərdə tutulub.
