Donyonun transferi...Kamran Quliyevlə Ceyhun Sultanovu yaxınlaşdırır?
“Neftçi”nin son günlər transfer bazarında İsrailə üz tutması maraq doğurmaya bilməz. UEFA Konfrans Liqasına hazırlaşan komanda əvvəlcə “Aşdod”un dayaq yarımmüdafiəçisi Ataa Caber, daha sonra isə son mövsümü “Makkabi Hayfa”da keçirən hücumçu Qodsvey Donyo ilə müqavilə bağladı. Bəlkə də burda qeyri-adi heç nə axtarmağa dəyməz, hər iki futbolçu yeni məşqçini qane edib və onlarla razılıq əldə olunub.
Sadəcə 27 yaşlı Donyonun “Neftçi”yə klubun sabiq idman direktoru Ceyhun Sultanov vasitəsi ilə gəlməsi bir az təəccüblüdür. Sultanov əvvəlcə Donyo ilə sosial şəbəkədə şəklini paylaşdı, daha sonra isə açıqlama verdi ki, “bəli, bu transferdə mən də vasitəçilik etmişəm”.
İşin həm də maraqlı tərəfi odur ki, Ceyhun bəylə “Neftçi”nin prezidenti Kamran Quliyevin münasibətləri demək olar ki, yoxdur. O, ötən ay Msport.az-a müsahibəsində də https://msport.az/kamran-quliyevle-ne-zenglesirem-ne-de-elaqe-saxlayiram-ceyhun-sultanov bunu gizlətməmişdi:
“1,6 ay bundan qabaq “Neftçi”dən ayrılmışam və o vaxtdan Kamran Quliyevi yalnız bir dəfə görmüşəm. O da “Neftçi” Türkiyədə təlim-məşq toplanışında olanda. Mən də orada idim, həmin vaxt görüşdük. Ondan sonra heç bir əlaqəmiz olmayıb. Bu gün də heç bir münasibətim yoxdur, nə zəngləşirəm, nə də əlaqə saxlayıram. Kamran Quliyevə yalnız uğurlar arzulayıram”.
Azərbaycan reallığını nəzərə alsaq, Sultanov indi “Neftçi”yə yaxın düşə bilməməli idi. Hamıya gün kimi aydındır ki, bütün klublar öz tanıdıqları, sınanmış, etibar elədikləri menecerlərlə işləməyə üstünlük verirlər. Belə çıxır ki, “Neftçi” olduqca demokrtik klubdur və sabah tutaq ki, klubun prezidentinin, vitse-prezidentinin illərdir danışdırmadığı adamdan da futbolçu götürə bilərlər. Ya da bəlkə Kamran Quliyevlə Ceyhun Sultanovun “pis” münasibətləri media üçündür. Məsələ heç təqdim olunan kimi deyil. Açığı millimizin sabiq üzvünü hələ futbolçu vaxtından səmimi, sözün düzünü deyən insan kimi tanıdığımdan bu versiyaya da inana bilmirəm.
Hər nədirsə, maraqlı proses gedir, gözləyək görək, “Neftçi”nin növbəti transferləri kimlər olacaq.
AYXAN
