"İticket.az"ın gülüş obyektinə çevirilməsi - FOTO
“Qarabağ”ın avrokuboklardakı oyunlarından sonra “iticket.az”-a münasibət birmənalı deyil. Ağdam klubunun Çempionar Liqasının pley-off mərhələsinin “Viktoriya Plzen”lə görüşündən əvvəl baş verənləri hər kəs yaxşı xatırlayır. Sayt çökdü, azarkeşlər online bilet almaqda problemlərlə üzləşdi, əsəblər tarıma çəkildi.
Bu dəfə “iticket.az”-ın sisteminin niyə və necə çökməyindən, saytın böyük yükləməyə tab gətirmədiyindən danışmayacağıq. Sadəcə saytın futbolla bağlı son paylaşmaları diqqətimizi cəlb etdi. Artıq sosial şəbəkə istifadəçiləri də “iticket.az”-ın səriştəsizliyini lağa qoyur.
Msport.az xəbər verir ki, sayt “Viktoriya Plzen”lə matçın biletlərinin satışa çıxarılması ilə bağlı xəbəri Miçelin posteri ilə təqdim etmişdi. Halbuki Miçel artıq 2 ildir ki, Ağdam klubundan ayrılıb.
İndi isə “iticket”.az-da Millətlər Liqası çərçivəsində sentyabrın 25-də keçiriləcək Azərbaycan – Qazaxıstan qarşılaşmasının biletləri satışa çıxarılıb. Təsəvvür edin, posterdə kimin fotosu yerləşdirilsə, yaxşıdır? Milli komandaya dəvət almayan Qara Qarayevin.
Yəni o boyda saytda futbolu izləyən, gündəmdən xəbəri olan bir adam yoxdur?
