“Kəpəz”in futbolçuları, “Zirə”nin məşqçiləri 5 oyunluq cəzalandı
AFFA İntizam Komitəsinin iclası keçirilib.
Msport.az xəbər verir ki, iclasda AFFA-nın bayrağı altında keçirilən turnirlərlə bağlı aşağıdakı qərarlar qəbul olunub:
Futzal üzrə Yüksək Liqanın 5-ci turunun “Neftçi” İK İB – “Rekord” oyununda “Neftçi”nin oyunçusu Namiq Məmmədkərimov ikinci sarı vərəqə aldıqdan sonra qırmızı vərəqə alaraq oyundan qovulan zaman hakimlərin ünvanına təhqiramiz ifadələr işlədərək onlara fiziki təsir göstərdiyinə görə 10 oyunluq cəzalandırılıb.
Futzal üzrə I Liqanın 4-cü turunun “Star Kargo” – “Dəstə Ordubad” oyununda “Star Kargo”nun oyunçusu Gülalı Mehrəliyev ikinci sarı vərəqə və qırmızı vərəqə aldıqdan sonra meydanı tərk edərkən hakimlər briqadasını təhqir etdiyinə görə 4 oyun cəzalanıb.
Futzal üzrə II Liqanın 4-cü turunun “Timsport” – “Rəvan” oyununda “Timsport”un oyunçusu Fərid Quliyev ikinci sarı, nəticədə qırmızı vərəqə aldıqdan sonra hakimə etiraz olaraq nalayiq hərəkətlər edib. O, meydançaya tüpürüb, avadanlıqlara zərbə endirib, hakimləri davamlı şəkildə təhqir edib, meydançanı tərk etməkdən imtina edib və oyunun bərpasını yubadıb. Daha sonra tribunada əyləşərək hakimləri təhqir etməyə davam etdiyinə görə Fərid Quliyev 4 oyun cəzalanıb.
Futzal üzrə II Liqanın 4-cü turunun “Advokat” – “Xan Lənkəran” oyununda “Advokat”ın oyunçusu Ceyhun Şirinli hakimin qərarına etiraz etdiyinə görə ikinci sarı vərəqə almaqla qırmızı vərəqə ilə meydandan kənarlaşdırılarkən hakimlərin ünvanına kəskin etiraz edərək su qabını bir neçə dəfə oyun meydanına çırpıb, ayaqla zərbə vurub. Buna görə Ceyhun Şirinli 3 oyun cəzalandırılıb. “Xan Lənkəran”ın oyunçusu Rufin Sarıyev hakimin qərarına etiraz etdiyinə görə ikinci sarı vərəqə almaqla qırmızı vərəqə ilə meydandan xaric olduğu zaman hakimlərin ünvanına kəskin etiraz etdiyinə görə 1 oyun cəzalandırılıb.
Gənclər Liqasının İCBFA – “Kəpəz” PFK oyununda İCBFA-nın futbolçusu Alıreza Rahimi təcavüzkar davranışa görə qırmızı vərəqə ilə meydandan kənarlaşdırılılıb. Qarşılaşma bitdikdən sonra İCBFA komandası tərəfindən təhlükəsizlik tədbirləri təmin edilmədiyinə görə azarkeşlər meydana daxil olaraq “Kəpəz” komandasına qarşı təzyiq göstəriblər. Bunun nəticəsində yaranmış kütləvi dava dalaşda “Kəpəz”in futbolçuları Elşən Mirzəyev, Cahangir Nəbiyev, Sənan Kərimov və Arzu Atakişiyev, eləcə də İCBFA-nın futbolçuları Qürbət Əhmədov, Elmin Qaçaylı, Nihat Bayramlı, İbrahim Bağırov və öncədən qırmızı almış Alıreza Rahimi aktiv iştirak etdiyinə görə dava-dalaş salan hər iki klubun adları çəkilən oyunçuları ayrı-ayrılıqda 5 oyun cəzalandırılıb. İCBFA klubu 3 oyunu azarkeşsiz keçirəcək.
AFFA U-14 Liqasının “Neftçi” PFK – “Zirə” PFK oyunu başa çatdıqdan sonra “Zirə”nin məşqçilər korpusu və azarkeşləri meydana daxil olaraq hakimlər briqadasına hücun etməyə cəhd göstəriblər. Oyundan sonra bir neçə saat keçməsinə baxmayaraq, bəzi azarkeşlər meydanın ətrafında qalaraq hakimlərin sağlamlığına təhlükə yaradacaqları barədə hədə-qorxu gəlməyinə görə “Zirə”nin oyunları 3 oyun azarkeşsiz keçiriləcək. “Zirə”nin məşqçi korpusu (xətanı törədən şəxslər) 5 oyun cəzalandırılıb.
AFFA U-14 Liqasının “Record” – İCBFA oyununda “Record” adı protokolda olmayan 70 nömrəli oyunçunu meydana buraxıb və həmin oyunçu oyun ərzində həm qol vurub. Həm də sarı vərəqə ilə cəzandırılıb. Həmçinin qarşılaşmanın 77-ci dəqiqəsində adı protokolda olmayan 22 nömrəli oyunçu meydana daxil edilib. Bunlara görə “Record” komandasına 0:3 hesablı texniki məğlubiyyat verilib. Qarşılaşma bitdikdən sonra “Record”un futbolçusu Rəhman İbrahimov rəqib komandasının oyunçusuna başı ilə zərbə endirdiyi üçün qırmızı vərəqə ilə meydandan kənarlaşdırıldığına görə 2 oyun cəzalandırılıb.
AFFA U-14 Liqasının “Ramana” İM – “Baku Sporting” oyununda “Ramana” İM öncədən oyuna gəlməyəcəyini bildirib və oyun baş tutmayıb. Bu hal artıq 3-cü dəfə təkrarlandığına görə, “Ramana” İM AFFA-nın bayrağı altında keçirilən bütün yarışlardan xaric olunub.
AFFA U-13 Liqasının “Neftçi” PFK – “Sumqayıt” FK oyununda oyunu bitdikdən sonra “Sumqayıt”ın azarkeşi meydana daxil olaraq baş hakimi təhqir etdiyinə görə “Sumqayıt” klubuna xəbərdalıq edilib.
AFFA U-12 Liqasının 8 nömrəli İOEUGİM – AZART oyununda “Azart”ın baş məşqçisi Səxavət Ağazadə hakimi təhqir etdiyinə görə qırmızı vərəqə ilə meydandan kənarlaşdırdıqdan sonra meydana girib hakimə hədə-qorxu gəlməyə davam etdiyinə görə 5 oyun cəzalandırılıb.
AFFA U-11 Liqasının PFA – “Ramana” İM oyununda “Ramana”nın heyətində yetərsay olmadığı üçün oyun baş tutmadığına görə “Ramana”ya 0:3 hesablı texniki məğlubiyyat verilib.
AFFA U-11 Liqaısnın “Sumqayıt City” – “Məhəllə Uşaqları” oyununda “Məhəllə Uşaqları”nın heyətində yetərsay olmadığı üçün oyun baş tutmağına görə “Məhəllə Uşaqları”na 0:3 hesablı texniki məğlubiyyat verilib.
AFFA U-11 Liqasının VII turunun “Kürdəmir” Gİİ” – “Şamaxı” oyunu bitdikdən sonra “Kürdəmir”in baş məşqçisi Əfrayıl Həşimov hakimi vurmağa cəhd göstərdiyi və təhqir etdiyinə görə 5 oyun cəzalandırılıb.
AFFA U-11 Liqasında iştirak edən “Dortmund Bakı” FK komandası liqada iştirak etməkdən imtina etdiyinə görə yarışlardan kənarlaşdırılıb.
