"Kim istəməz ki, bombardir olsun?" - Musa Qurbanlı
“Qarabağ”ınhücumçusu Musa Qurbanılı mövsümün son oyunu – “Turan Tovuz”la matçdan sonra jurnalistlərin suallarını cavablandırıb.
Msport.az xəbər verir ki, 21 yaşlı forvard gələcək karyerası barədə də danışıb:
– Hər mövsümün öz çətinliyi var. Asan mövsüm olmur. Burada bizim 1 illik əziyyətimiz var. Meydandan kənarda çəkdiyimiz əziyyətlər, məşqlər görünmür. Bütün mövsümlərdə futbolçuların, məşqçilərin, klubun işçilərinin zəhməti var. Ona görə də hər il çempion olanda çox böyük sevinc yaşayırıq. Bu il bizə “Sabah” bir az çətinlik yaratdı. Bu da bizi sevindirir. İstərdik ki, “Neftçi”, “Zirə”, “Qəbələ” və digər klublarımız da çox inkişaf etsinlər, çempionatımız maraqlı olsun. Bu, bizə ancaq xeyir verə bilər.
– Bombardir olmadığına görə üzülmədin?
– Yox. Hər oyun qol vurmaq istəyirəm. Elə matç olmayıb ki, qol vurmaq istəməyim. Bu oyun da onlardan biri idi. Kim istəməz ki, bombardir olsun? Amma çox məyus olmuram. Şükür Allaha, 21 qol vurdum. Bombardir Ramil Şeydayev oldu. O da kənar adam deyil, özümüzünküdür. Onun üçün çox sevindim. Əlimdən gələni etdim. Xeyirlisi belə imiş.
– Bu yayda Avropaya gedişin baş tuta bilər?
– Hələ ki, bu haqda dəqiq qərar verilməyib. Çempionatın bitməsini gözləyirdik.
– Son qərarı özün verəcəksən, yoxsa Qurban Qurbanov?
– İkimiz bir yerdə qərar verəcəyik. Gedib oynayası olan mənəm. Amma atamın qərarı olmadan addım atmaram. Əlbəttə ki, onunla məsləhət olunacaq. Çünki, atamın həyatda və futbolda təcrübəsi məndən qat-qat çoxdur.
– “Qarabağ”da qalsan, yeni mövsümdə səni komandanın əsas hücumçusu kimi görə bilərik?
– Bunu mən deyə bilmərəm. Mənim işim meydana çıxıb oynamaqdır. Onu zaman göstərəcək.
– Ölkə çempionatında 21 qol vurdun, amma avrokuboklarda qolun yoxdur. Bu tramplini nə vaxt aşacaqsan?
– Ölkə çempionatında 30-dan çox oyunum var. Avrokuboklarda isə demək olar 2 matçda oynamışam. Oynadıqca düzələr.
– “Zaltsburq”, “Poqon” klubları ilə adın hallanır. Təkliflər realdır?
– Təklifi kluba göndərirlər, mənim özümə yox. Rəsmi təklif olsa, yəqin ki, xəbərimiz olar. Maraqlananların olması normaldır. Çünki, gənc futbolçunun nəticəsi varsa, maraqlanan olur. Bunu ümumi məlumat olaraq bilirəm.
