"Komandam yaxşı mübarizə aparıb layiqli qələbə qazandı" - Elmar Baxşiyev
“Qəbələ” Azərbaycan Premyer Liqasının 32-ci turunda doğma meydanda “Səbail”i 4:2 hesabı ilə məğlub edib.
Msport.az xəbər verir ki, matçdan sonra keçirilən mətbuat konfransında “qırmızı qaralar”ın baş məşqçisi Elmar Baxşıyev jurnalistlərin suallarını cavablandırıb:
– Bilirdik ki, bizi ağır oyun gözləyir. Komanda sıx qrafikdə idi. Buna görə də çətinliklər öncədən görünürdü. Komandam yaxşı mübarizə aparıb layiqli qələbə qazandı.
– 3:0-dan sonra komandanız sanki oyundan qopdu. Nə baş vermişdi?
– Heç nə baş vermir. 3:0 udan komandanın tempi aşağı salmağı normaldır. Amma sevindirici məqam odur ki, komanda özündə güc tapıb son nöqtəni qoya bildi.
– 3 dəyişikliyi eyni anda etdiniz. Bu, nə ilə bağlı idi?
– Futbolçuların durumuna görə dəyişikliklər edirik. Yeni oyunçular meydana girəndən sonra tempi ələ aldıq. Futbolçuların durumu 90 dəqiqə oynamağa hazır deyildi. Buna görə də dəyişikliklər etdim.
– İsnik Aliminin yoxluğunda mərkəzdə Asif Məmmədovu oyunu idarə edirdi. Onu tez əvəzləməyinizin səbəbi nə idi?
– Hər iki futbolçu bizim üçün önəmlidir. Hücumları həmin oyunçular qurur. Asif xəstələnmişdi. Oynamağı sual altında idi. Xarakter göstərib oyuna çıxdısa, komanda olaraq ona təşəkkür edirik.
– Murad Musayev çox səhvlər edirdi. Hazır deyil?
– Hazırlıqla bağlı deyil. Tək Murad səhv etmir, Məqsəd də, Ruan da səhvlər edir. Sırf onun üzərində dayanmırıq.
– Son matçlarda qapıda Atanqanaya şans verirsiniz. Artıq onu əsas qapıçı hesab etmək olar?
– Bəli, son matçlarda onun üzərində dayanırıq. Amma səviyyəcə qapıçılarımızın ikisi də eynidir.
– Əvəzetmələri tez etdiyinizə görə “Səbail” üstünlüyü ələ aldı sanki…
– Üstünlüyü 3 futbolçuya görə rəqibə vermədik. Sadəcə hesab belə oynamağımıza gətirib çıxarırıdı. Dəyişiklik etməsəydik də, tempi saldığılmıza görə rəqin üstünlüyü ələ alacaqdı. Dörd gündən bir oynayırıq. Tempi saxlamaq asan deyil.
– Yaovi Akakpoya niyə şans vermədiniz?
– Oyun elə gedirdi ki, rəqib üstümüzə gəlirdi. Buna görə də daha bir hücumumeyilli oyunçu buraxmağa ehtiyac duymadım. Yaovi inandığımız futbolçudur. Onunla müqaviləni yeniləyəcəyik. Həmin mövqedə oynayan futbolçular pik formadadır. Buna görə də Yaovi şans qazana bilmir.
– Futbolçularla yeni müqavilə ilə bağlı danışıqlar başlayıb?
– Hələ ki, yeni-yeni danışıqlara başlamışıq. Yerlilərdən Ürfanla müqaviləni yeniləmişik. Yaovi ilə də razılıq əldə olunub. Proses yeni başlayıb.
– Özünüz “Qəbələ”də qalacaqsınız?
– Mən “Qəbələ”də yeni sima deyiləm. Hələ ki, buradayam. Mətbuatda nə qədər yazılar çıxsa da, bütün fikrim buradadır.(sportal)
