“Neftçi” ilə “Qəbələ”nin 62-ci dueli
“Qəbələ” Misli Premyer Liqasının XIV turunda Bakıda “Neftçi”nin qonağı olacaq.
Msport.az xəbər verir ki, “Bakcell Arena”da baş tutacaq matç rəqiblərin 62-ci dueli olacaq.
Komandalar indiyədək 61 dəfə qarşılaşıblar. Aktivində 18 qələbə olan “Qəbələ” 16 heç-heçə edib və 27 dəfə məğlub olub. Rəqib qapısına 74 top vuran “Qəbələ” futbolçuları 89 qol buraxıblar.
Noyabrın 12-də keçiriləcək oyun Premyer Liqa çərçivəsində 57-ci qarşılaşma olacaq. Əvvəlki 56 matçda 17 qələbəsi olan bu komanda 13 dəfə bir xalla kifayətlənib və 26 dəfə uduzub. Rəqib qapısına 67 dəfə yol tapan “qırmızı-qaralar” 84 top buraxıb.
“Neftçi” ilə səfərdə 31-ci dəfə görüşəcək “Qəbələ” rəqib meydanında 9 dəfə qalib gəlib, 8 heç-heçə edib və 13 dəfə uduzub. “Qəbələ” səfərdə 36 qol vurub, 43-nü buraxıb.
Xatırladaq ki, noyabrın 12-də “Bakcell Arena”da keçiriləcək matç 18:30-da başlayacaq.
