"Qardaşımı qorumaq üçün yaxşı ki səhv etmişəm" - Millimizin üzvü
Azərbaycan millisinin və “Eyndhoven”in futbolçusu Ozan Can Kökçü qardaşı Orkun Kökçünün “Feyenoord”un heyətində Niderland Erediviziyasının qalibi olmasından danışıb.
Msport.az xəbər verir ki, 25 yaşlı yarımmüdafiəçi qardaşının uğurları ilə qürur duyduğunu bildirib:
“Feyenoord”un çempionluğu ilk növbədə Orkun üçün, daha sonra isə bütün ailə üçün əla andır. Uzun yol qət etmişik. 18 yaşım olanda “Feyenoord”un U19 komandasından “Bursaspor”a keçdim. Ancaq bu işə yaramadı. İnkişafımın bütün dövrünü qaçırdım”.
Kökçü Türkiyədə istedadlı futbolçulara qarşı münasibətin fərqli olduğunu vurğulayıb: “Orkun Gənclər Liqasında çox yaxşı çıxış edərkən “Feyenoord”un əsas komandasında şans qazana bilmədiyi üçün səbirsizlənirdi. Həmin vaxt Türkiyənin böyük klublarından konkret maraq var idi. Onu “Qalatasaray”, “Beşiktaş” və “Fənərbaxça” istəyirdi. Sonra hamımız onu səbirli olmağa və inkişafı naminə “Feyenoord”da qalmağa çağırdıq. Mən Türkiyədə oynamışam və orada gənc futbolçularla işlərin necə qurulduğunu bilirdim. Geriyə baxanda düşünürəm: qardaşımı qorumaq üçün yaxşı ki səhv etmişəm”.
Qeyd edək ki, Ozan Can Kökçü əvvəllər Azərbaycanda “Sabah” komandasının, eləcə də U-20 və U-21 yığmalarının da formasını geyinib.
