featured-image-18103

“Neftçi”nin baş məşçqisi Laurentsiu Regekampf Premyer Liqanın 16-cı turu çərçivəsində “Qarabağ”a qarşı keçirdikləri oyunu şərh edib.

Msport.az xəbər verir ki, rumıniyalı mütəxəssis 0:4 hesabıyla uduzduqları oyundan sonra baş tutan mətbuat konfransında aşağıdakı fikirləri səsləndirib:

“Danışılası çox şey yoxdur. Matçdan əvvəl hazırladıqlarımızdan heç birini meydanda etmədik. Ürəklə oynamaq, mübarizə aparmaq və qaçmaq lazımdır. Nəticəyə görə üzülürəm. Bu klubu sevən azarkeşlər qarşısında çox utanıram. Tezliklə özümüzə qayıtmalıyıq. Bizi “Zirə” ilə kubok qarşılaşmaları gözləyir. Çətin olacaq”.

47 yaşlı mütəxəssis qarşılaşmaya bir daha baxacağını bildirib: “Hamı üzgündür. Amma bu, kifayət deyil. Bu gün “Qarabağ”la görüşdə mübarizə aparmadıq”.

Baş məşqçi oyunçular haqqında danışmaq istəmədiyini söyləyib: “Hansı oyunçu həftə ərzində özünü yaxşı tərəfdən göstərsə, matçda ona şans veririk. Bütün futbolçularımı müdafiə edəcəyəm. Öz oyunçularım haqqında danışmayacağam. Onlarla tez-tez söhbət edirik. Çatışmayan cəhətlər haqqında danışırıq. Xahiş edirəm, bizə bir az da vaxt verin. Məqamı çatanda hər şey haqqında biləcəksiniz”.

Regekampf 0:2 hesabı ilə geriyə düşdükdən sonra oynamadıqlarını etiraf edib: “Bizdə təcrübəli futbolçular var. Onlar komanda yaxşı oynamayanda vəziyyəti öz üzərilərinə götürməlidirlər. Bu günlərdə oyunçularla bu barədə danışacağam. Azarkeşlərin belə qarşılaşmadan sonra narazı olması normaldır. Təhqirlərlə barışa bilmərəm. Amma onlar haqlıdırlar”.

Baş məşqçi Azərbaycan kubokunun 1/4 finalında “Zirə”yə qarşı oyunlar haqqında fikirlərini bölüşüb: “Əminəm ki, futbolçular bu situasiyada qalmayacaqlar. Hamısı daxilən əziyyət çəkir. Bu, soyuq duş idi. “Zirə” ilə görüşdə tamam komanda görəcəksiniz”.

Bənzər xəbərlər