Canni De Byazi: “Həyatda hər şey mümkündür”
“Sabah əlimizə düşən imkanlardan yararlanmalıyıq”.
Msport.az xəbər verir ki, bunu Azərbaycan millisinin baş məşqçisi Canni De Byazi Belçikaya qarşı keçirəcəkləri AVRO-2024-ün seçmə mərhələ oyunundan əvvəl mətbuat konfransında deyib.
67 yaşlı mütəxəssis əvvəlki bütün qarşılaşmalarda tam güclərini qoyduqlarını bildirib: “Güclü kollektivlə oynayacağıq. İnkişaf etmişik, amma daha çox çalışmalıyıq. Biz artıq öz oyunumuzu tapmışıq. Avstriya və Belçika ilə evdəki görüşlərdə də yaxşı çıxış etmişdik. Buna baxmayaraq imkanlardan yararlana bilmədik. İsveçlə ev qarşılaşmasında isə bunu bacardıq. Sabah eyni intensivliyi davam etdirməli və imkanlarımızdan istifadə etməliyik. Birinci matçda bunu bacarmadıq. Amma evdə bu rəqibdən çəkinməmişdik”.
İtaliyalı baş məşqçi müqaviləsinin başa çatmasına da toxunub: “Bu, hazırda məni maraqlandırmır. Bu barədə danışmaq istəmirəm”.
De Byazi start heyəti sabah müəyyənləşdirəcəyini sözlərinə əlavə edib.
O, Qazaxıstanın Sloveniyanı məğlub etməsi durumunda AVRO-2024-də pley-off şanslarının yaranmasına da münasibət bildirib: “Biz əlimizdən gələni etməliyik. Çətin məsələdir, amma həyatda hər şey ola bilər”.
Qeyd edək ki, noyabrın 19-da Brüsseldəki “Kinq Baudouin” stadionunda keçiriləcək Belçika – Azərbaycan oyunu Bakı vaxtı ilə saat 21:00-da başlayacaq. Meydan sahibləri F qrupunda 17 xalla ikincidir. Komandamız isə 7 xalla 4-cü sırada qərarlaşıb. (Report)
