"Hər kəsi səbrli olmağa çağırıram" - Ayxan Abbasov
Yeni mövsümə hazırlaşan “Turan Tovuz” Gürcüstandakı təlim-məşq toplanışını başa vurub.
Msport.az xəbər verir ki, komandanın baş məşqçisi Ayxan Abbasov yoxlama oyunlarını və Gürcüstan toplanışını klubun mətbuat xidmətinə açıqlamasında dəyərəndirib:
“Bu təlim-məşq toplanışı bizim üçün vacib idi. Yeni formalaşan komandayıq. Çempionatın başlamasına az qalıb. Qısa müddət ərzində Gürcüstan yüksək liqa komandaları ilə oyunlarda futbolçuların bir-birinə uyğunlaşması, səhvlərimizi görmək baxımından çox vacib toplanış oldu. Yüksək tempdə hazırlaşdıq. Kiçik zədələrimiz də oldu, xüsusən Şakir Seyidovun zədələnməsi işlərimizə bir qədər mane oldu. Bütün heyyət ideal formaya yaxınlaşmaq üçün istəklə çalışdılar. Bütün futbolçuları sınaqdan keçirmək imkanımız oldu. Heyətdə olan gənc futbolçularımız da güclü rəqiblərə qarşı özlərini müsbət tərəfdən göstərə bildilər. Belə toplanışlarda nəticə önəmli deyil.
Çempionat oyunları hamı üçün çox çətin keçəcək. Oturuşmuş heyətə malik rəqiblərlə oynayacağıq. Lakin ümid edirəm ki, layiqli mübarizə aparmağa gücümüz çatacaq. Bu gün Tbilisi toplanışını başa vurub vətənə qayıdırıq. 2 gün istirahətdən sonra Tovuzda yenidən bir araya gəlib “Qəbələ” ilə oyunun hazırlıqlarına başlayacağıq. Komanda 9 ildən sonra Premyer Liqaya vəsiqə qazanıb. Qısa müddətdə bəzi problemlər oldu. Təlim-məşq toplanışının tez bir zamanda təşkil olunmasında klub rəhbərliyinə, şəxsən Tovuz Rayon İcra Hakimiyyətinin başçısı Məmməd Məmmədova təşəkkürümü bildirmək istəyirəm. Səbrsizliklə azarkeşlərimizin qarşısında keçirəcəyimiz ev oyunlarını gözləyirik. Hər kəsi səbrli olmağa, bizə güvənməyə və dəstəkləməyə çağırıram ”.
